குடும்பப் பிரச்னை! பெரம்பலூா் ஆட்சியரகத்தில் மூவா் தற்கொலை முயற்சி

பெரம்பலூா் மாவட்ட ஆட்சியா் அலுவலக வளாகத்தில், குடும்பப் பிரச்னையில் கணவன் மீது நடவடிக்கை மேற்கொள்ள வலியுறுத்தி, பெண் தனது தாய், தந்தையுடன் உடலில் டீசல் ஊற்றிக்கொண்டு சனிக்கிழமை தற்கொலை முயற்சியில் ஈடுபட்டாா்.

பெரம்பலூா் மாவட்டம், ஆலத்தூா் வட்டம், பெருமாள்பாளையம் கிராமத்தைச் சோ்ந்த செங்கமலை மகள் காருண்யாவுக்கும் (25), திருச்சி மாவட்டம், லால்குடி வட்டம், நெய்க்குளம் கிராமத்தைச் சோ்ந்த விஸ்வலிங்கம் மகன் ராமஜெயத்துக்கும் (31), கடந்த 19.5.2024-இல் திருமணம் நடைபெற்றது. திருமணமான சில நாள்களிலேயே மது போதையில் வீட்டுக்குச் சென்ற ராமஜெயம், வரதட்சனையாக ரூ. 2 லட்சம் பணம் கேட்டு, தனது மனைவி காருண்யாவை தாக்கி துன்புறுத்தியுள்ளாா். இச் செயலுக்கு ராமஜெயத்தின் அண்ணன் விக்னேஷ்வரன் (35), அவரது மனைவி ரோஜா (30) ஆகியோரும் உடந்தையாக இருந்தனராம். இதனிடையே காருண்யா கா்ப்பமடைந்த நிலையில், ராமஜெயம் தாக்கியதில் கா்ப்பம் கலைந்துவிட்டதாம்.

இதனால் மனமுடைந்த காருண்யா, பெருமாள் பாளையத்தில் உள்ள தனது பெற்றோா் வீட்டுக்கு கடந்த மே மாதம் சென்றுவிட்டாராம். இதையடுத்து, வரதட்சனை கேட்டு கொடுமைப்படுத்திய கணவன் மற்றும் அவரது உறவினா்கள் மீது நடவடிக்கை எடுக்க கோரி, பெரம்பலூா் அனைத்து மகளிா் காவல் நிலையத்தில் காருண்யா புகாா் அளித்தாா். இந்த புகாா் மனு மீது விசாரணை மேற்கொள்வதற்காக, போலீஸாா் பலமுறை அழைப்பு விடுத்தும் ராமஜெயம் வரவில்லை எனக் கூறப்படுகிறது.

இந்நிலையில், கடந்த 2 நாள்களுக்கு முன்பு ராமஜெயம் தனது இன்ஸ்டாகிராமில், மனைவி காருண்யாவை பற்றி தவறான தகவலை பதிவிட்டதோடு, கைப்பேசியில் தொடா்புகொண்டு நாம் இருவரும் ஒன்றாக இருந்த வீடியோ பதிவை எடுத்து வைத்துள்ளதாகவும், அதை சமூக வலைதளத்தில் பதிவேற்றம் செய்ய உள்ளதாகவும் மிரட்டியுள்ளாா்.

இதனால் மனமுடைந்த காருண்யா, தன் தந்தை ராஜகோபால் (65), தாய் சரஸ்வதி (41) ஆகியோருடன் மாவட்ட ஆட்சியா் அலுவலக வளாகத்தில், டீசலை தங்களது உடல் மீது ஊற்றிக்கொண்டு சனிக்கிழமை தற்கொலைக்கு முயன்றனா். இதையடுத்து, அங்குப் பாதுகாப்புப் பணியிலிருந்த போலீஸாா் அவா்களை மீட்டு, பெரம்பலூா் அனைத்து மகளிா் காவல் நிலையத்தில் ஒப்படைத்தனா். தொடா்ந்து, போலீஸாா் அவா்களிடம் விசாரணை மேற்கொண்டு வருகின்றனா்.