Enable Javscript for better performance
குடிநீர் தேவையை பூர்த்தி செய்யாவிடில் ஊரைக் காலி செய்யும் நிலை ஏற்படும்: கிராம மக்கள் ஆதங்கம்- Dinamani

சுடச்சுட

    

    குடிநீர் தேவையை பூர்த்தி செய்யாவிடில் ஊரைக் காலி செய்யும் நிலை ஏற்படும்: கிராம மக்கள் ஆதங்கம்

    By DIN  |   Published on : 31st March 2018 09:30 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    ஆவுடையார்கோவில் அருகே செங்கானம் ஊராட்சிக்குள்பட்ட கிராமத்தில் குடிநீர் தேவை பூர்த்தி செய்யாவிட்டால் கிராமத்தை காலி செய்யும் நிலை ஏற்படும் என்கின்றனர் கிராம மக்கள்.
    தென்னமாரி, மங்களம், பெட்டிவயல் உள்ளிட்ட கிராமங்களில் 500க்கும் அதிகமான குடும்பத்தினர் வசிக்கின்றனர். இவர்களுக்கு கடந்த 7 ஆண்டுகளாக முறையான குடிநீர் விநியோகம் செய்யப்படவில்லை எனக் கூறப்படுகிறது. இதுதொடர்பாக குடிநீர் வடிகால் வாரிய அதிகாரிகளிடம் பலமுறை புகார் மனு அளித்தும் நடவடிக்கை எடுக்கப்படவில்லையெனத் தெரிகிறது. 
    இதையடுத்து மாவட்ட ஆட்சியரிடம் கிராம மக்கள் சார்பில் அளிக்கப்பட்ட மனுவைத் தொடர்ந்து, கிராமங்கள் மேடான பகுதியாக இருப்பதோடு, போதிய அழுத்தம் இல்லாத காரணத்தால் மேற்கண்ட கிராமங்களுக்கு போதுமான அளவு குடிநீர் விநியோகம் செய்ய முடியவில்லை என குடிநீர் வடிகால் வாரியம் தரப்பில் தெரிவிக்கப்பட்டிருக்கிறது.
    குடிநீர் விநியோகம் இல்லாததால் கட்டுமாவடியிலிருந்து எடுத்து வரப்படும் தனியார் குடிநீர் லாரியிலிருந்து குடம் தண்ணீர் ரூ.15 கொடுத்து வாங்கி வாரம் முழுவதற்கும் பயன்படுத்த வேண்டியிருக்கிறது. 
    இந்த நிலையை மாற்றி கிராமங்களில் குடிநீர் தேவையை பூர்த்தி செய்யும் வகையில் புதிய ஆழ்குழாய் கிணறு அமைப்பது அல்லது  ஆயக்குடி பிரிவு சாலையில்  அமைக்கப்பட்டிருக்கும் நீர்தேக்கத் தொட்டியிலிருந்து கிராமத்திற்கு எடுத்துச் செல்ல புதிய வழித்தடம் அமைக்க வேண்டும் என அண்மையில் நடைபெற்ற குறைதீர் கூட்டத்தில் மாவட்ட ஆட்சியரிடம் கிராம மக்கள் சார்பில் மனு அளிக்கப்பட்டது.
    இதுகுறித்து தென்னமாரி மங்களம் கிராமத்தைச் சேர்ந்த எஸ்.சுப்பிரமணியன் கூறுகையில்,  கடந்த 2013ஆம் ஆண்டு அமைக்கப்பட்ட குடிநீர்  மேல்நிலை நீர்த்தேக்க தொட்டி, மின்சிறு விசைபம்பு, குடிநீர்த் தொட்டி பயன்பாடின்றி கிடக்கிறது. 
    கிராமத்தில் நிலவும் குடிநீர்த் தேவையை பூர்த்தி செய்வதில் மாவட்ட மற்றும் ஊராட்சி நிர்வாகம் தொடர்ந்து புறக்கணிப்பு செய்தால் கிராமத்தைக் காலி செய்து வேறு ஊர்களுக்கு இடம்பெயரும் நிலை ஏற்படும் என்றார்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai