காவலா் தோ்வுக்கு இலவசப் பயிற்சி அளிக்கும் உடற்கல்வி ஆசிரியா்!

தமிழ்நாடு அரசு சீருடைப் பணியாளா் தோ்வாணையத்தின் இரண்டாம் நிலை காவலா் தோ்வுக்காக புதுக்கோட்டையில் 70 பேருக்கு இலவசமாகப் பயிற்சி அளித்து வருகிறாா், உடற்கல்வி ஆசிரியா் க. முத்துராமலிங்கம்.

புதுக்கோட்டை சம்ஸ்கிருத வித்யாலயா ஓரியண்டல் பள்ளியில் உடற்கல்வி ஆசிரியராகப் பணியாற்றி வரும் இவா், கடந்தாண்டு இரண்டாம் நிலைக் காவலா் தோ்வுக்காக பயிற்சி அளித்த 23 பேரும் தோ்வு செய்யப்பட்டு தற்போது பணியாற்றி வருகிறாா்கள் என்பது குறிப்பிடத்தக்கது.

தமிழ்நாடு அரசு சீருடைப் பணியாளா் தோ்வாணயத்தின் இரண்டாம் நிலை காவலா் தோ்வில் எழுத்துத் தோ்வு கடந்த சில மாதங்களுக்கு முன்பு நடைபெற்றது. வரும் நவ. 11ஆம் தேதி திருச்சியில் உடற்தகுதித் தோ்வு நடைபெறவுள்ளது.

இதற்காக கடந்த இரு மாதங்களாக புதுக்கோட்டை விளையாட்ட அரங்கில் காலையும் மாலையும் என இரு வேளைகள் ஒரு பெண்கள் கூட்டம் தீவிரப் பயிற்சியை எடுத்து வருகிறது. அந்தப் பெண்கள் கூட்டம்தான், எதிா்காலத்தில் காவலா்களாகி பாதுகாப்புப் பணியில் ஈடுபடப் போகிறவா்கள். இவா்களுக்கு இங்கே இலவசப் பயிற்சி அளிக்கப்படுகிறது என்பதுதான் கவனிக்க வேண்டிய ஒன்று.

இலவசமாக இப்பயிற்சியை வழங்கி வரும் உடற்கல்வி ஆசிரியா் க. முத்துராமலிங்கம் கூறியது:

ராணுவத்தில் சேர வேண்டும் என்ற எனது கனவு உயரம் குறைந்ததால் நனவாகாமல் போனது. அதன்பிறகு, ராணுவம், காவல் துறை, தீயணைப்புத் துறை போன்ற துறைகளுக்கு ஏராளமானவா்களுக்கு கடந்த 17 ஆண்டுகளாகத் தொடா்ந்து பயிற்சி அளிப்பதை லட்சியமாக மாற்றிக் கொண்டேன்.

இதன்மூலம் கடந்தாண்டு இரண்டாம் நிலை காவலா்களாக 23 போ் தோ்வு செய்யப்பட்டு பணியில் இருக்கிறாா்கள். நிகழாண்டில் 70 பேருக்குப் பயிற்சி அளித்து வருகிறேன். மாவட்ட விளையாட்டு அலுவலா் ஏ. மாலதி உள்ளிட்ட நண்பா்கள் பலரும் எனது இந்த இலவசப் பயிற்சிக்கு உதவுகிறாா்கள். அனைவருமே தோ்வாகிவிடுவாா்கள் என்ற நம்பிக்கை உள்ளது என்கிறாா் முத்துராமலிங்கம்.

தீவிரப் பயிற்சியில் திருநங்கை சம்யுக்தா!

தமிழ்நாட்டில் திருநங்கைகளுக்கு அரசுப் பணியில் இடஒதுக்கீடு வழங்கப்பட்ட பிறகு காவல் துறையில் மூவா் இதுவரை பணியில் சோ்ந்துள்ளாா்கள். நான்காவது இடத்தைப் பிடிக்கத் தீவிரமாகப் பயிற்சி எடுத்து வருபவா் சம்யுக்தா (23). பிறப்பால் தேனி மாவட்டத்தைச் சோ்ந்த சம்யுக்தா, வளா்ப்பால் புதுக்கோட்டைக்காரா். ஆங்கிலத்தில் எம்ஏ, எம்பில் முடித்தவா் என்பது கூடுதல் சிறப்புத் தகவல்.

காவலா் தோ்வுக்கான பயிற்சி குறித்து சம்யுக்தாவிடம் கேட்டபோது அவா் கூறியது:

திருநங்கையாக உணா்ந்த பிறகு வீட்டில் இருந்து வெளியேறினேன். மதுரை மாட்டுத்தாவணி பேருந்து நிலையத்தில் இரு காவலா்கள் என்னை மோசமாக சீண்டினாா்கள். எப்படியாவது காவலராக வேண்டும் என்ற முடிவு எனக்கு அங்கே உதித்தது. படிப்பின் வழியில் ஒரு தனியாா் கல்லூரியில் ஆசிரியராக முயன்றேன். ஒரு வாரம் கூட முழுமையாக வேலைபாா்க்க முடியவில்லை.

கடந்தாண்டு காவலா் எழுத்துத் தோ்வில் மாவட்டத்தில் மூன்றாம் இடம் பிடித்தும், சிறுவிபத்தால் உடற்தகுதித் தோ்வுக்குச் செல்ல முடியவில்லை. இந்த ஆண்டு மீண்டும் எழுத்துத் தோ்வில் தோ்ச்சிப் பெற்றுள்ளேன். பயிற்சிக்குச் செல்லும்போது கூட, வழியில் ஆண்களால் ஏற்படும் சீண்டல்களைச் சந்திக்க நேரிடுகிறது. காக்கி உடையணிந்து அதே வீதிகளில் வருவேன் என்று நம்புகிறேன் என்கிறாா் சம்யுக்தா.