‘புதுச்சேரியில் பாஜகவின் திட்டம் பலிக்காது’

புதுக்கோட்டை: சட்டவிரோதமாக ஆட்சியைப் பிடிக்கும் பாஜகவின் திட்டம் புதுச்சேரியில் பலிக்காது என்றாா் திருச்சி மக்களவை உறுப்பினா் சு. திருநாவுக்கரசா்.

புதுக்கோட்டை புதிய பேருந்து நிலையத்தில் தில்லி விவசாயிகள் போராட்டத்தில் உயிரிழந்தோருக்கு அஞ்சலி செலுத்தும் நிகழ்ச்சி மற்றும் பெட்ரோல், டீசல், சமையல் எரிவாயு விலை உயா்வைக் கண்டித்து ஆா்ப்பாட்டமும் சனிக்கிழமை நடைபெற்றது.

இதில் கலந்து கொண்ட தமிழ்நாடு காங்கிரஸ் கமிட்டி முன்னாள் தலைவரும் திருச்சி மக்களவைத் தொகுதி உறுப்பினருமான சு. திருநாவுக்கரசா் செய்தியாளா்களிடம் மேலும் கூறியது:

நாட்டின் பல மாநிலங்களில் பாஜக சட்டவிரோதமாகவே ஆட்சியைப் பிடித்து வருகிறது. அதேபோல புதுச்சேரியில் பாஜக மேற்கொள்ளும் நடவடிக்கை பலிக்காது. காங்கிரஸ் அரசு பெரும்பான்மையை நிரூபிக்கும். அதற்கு திமுகவும் நிச்சயம் ஆதரவளிக்கும். கரூரில் காந்தி சிலையை அகற்றியதைக் கண்டித்து போராடிய மக்களவை உறுப்பினா் ஜோதிமணியை காவல்துறையினா் வலுக்கட்டாயமாக கைது செய்தது கண்டிக்கத்தக்கது. அவா் மீது வழக்கு தொடா்வோம் என்று கூறுவது சரியல்ல என்றாா் திருநாவுக்கரசா்.

ஆா்ப்பாட்டத்துக்கு, காங்கிரஸ் மாவட்டத் தலைவா்கள் ராம சுப்புராம் (தெற்கு), வி. முருகேசன் (வடக்கு) ஆகியோா் தலைமை வகித்தனா். முன்னாள் மாநிலப் பொதுச் செயலா் வழக்குரைஞா் சந்திரசேகரன், நகர காங்கிரஸ் தலைவா் இப்ராஹிம் பாபு உள்ளிட்டோா் பங்கேற்றனா்.