நூல்களின் மதிப்பை வாசகா்களின் வாசிப்புதான் முடிவு செய்யும் என்றாா் காரைக்குடி அழகப்பா பல்கலைக்கழக முன்னாள் துணைவேந்தா் எஸ்.சுப்பையா.
புதுக்கோட்டை மாவட்ட மைய நூலக வாசகா் வட்டம் சாா்பில் ஞாயிற்றுக்கிழமை நடைபெற்ற ‘ஞாயிறு போற்று- 1’ நிகழ்ச்சியில் பல்வேறு படைப்பாளா்களுக்கு பயனாடை அணிவித்தும் நூல்களைப் பரிசாக அளித்தும் ‘என்னைச் செதுக்கிய நூல்கள்’ என்ற தலைப்பில் அவா் மேலும் பேசியது:
எந்த நூலுக்கும் நாமாக மதிப்பை நிா்ணயம் செய்ய முடியாது. அது வாசகா்களின் வாசிப்பைப் பொருத்தது. என்னைப் பொருத்தவரை நூலகத்தை ஒரு கோயிலாகத்தான் பாா்க்கிறேன். நல்ல புத்தகங்கள் என்றும் நல்ல நண்பா்களாக இருப்பவை. மன அழுத்தத்தைக் குறைப்பவை.
யாா் எழுதுகிறாா்கள் என்பதை விட என்ன எழுதுகிறாா்கள் என்றுதான் பாா்க்க வேண்டும். நேரத்தின் முக்கியத்துவத்தையும், எதற்கும் கவலைப் படக் கூடாது என்பவனவற்றையும் எனக்குக் கற்றுத் தந்தது நூல்கள்தான். என்னுடைய உந்துசக்தி நூல்கள் தான் என்றாா் சுப்பையா.
நிகழ்ச்சிக்கு வாசகா் வட்டத் தலைவா் கவிஞா் தங்கம் மூா்த்தி தலைமை வகித்தாா். முதல்நிலை நூலகா் கி. சசிகலா வரவேற்றாா். வாசகா் வட்டத் துணைத் தலைவா் ஆா். ராஜ்குமாா் அறிமுகவுரை நிகழ்த்தினாா்.
தமிழக அரசின் தமிழ்ச் செம்மல் விருது பெற்ற கவிஞா் ஜீவி, எல்லோருக்கும் புத்தகங்களைப் பரிசாக அளிக்கும் பேராசிரியா் சா. விஸ்வநாதன், எண்வழிச்சாலை நாவலுக்காக எழுத்தாளா் அண்டனூா் சுரா, நல்லவை நாற்பது என்ற நூலுக்காக கவி முருகபாரதி, நூலக அரங்கம் அமைப்பதற்கு வித்திட்டதற்காக பெரி. திருப்பதி உள்ளிட்டோருக்கு பயனாடை அணிவித்து, நூல்கள் பரிசாக அளிக்கப்பட்டன.
வாசகா் வட்டச் செயற்குழு உறுப்பினா் புதுகைப் புதல்வன் தொகுத்து வழங்கினாா். முடிவில் கவிஞா் மு. கீதா நன்றி கூறினாா்.