புதுக்கோட்டையில் நடைபெறவுள்ள நகா்ப்புற உள்ளாட்சித் தோ்தலுக்காக போட்டியிட விரும்புவோரிடம் விருப்ப மனுக்களை திமுக மற்றும் பாஜக நிா்வாகிகள் ஞாயிற்றுக்கிழமை வழங்கத் தொடங்கியுள்ளனா்.
புதுக்கோட்டை மாவட்டத்தில் புதுக்கோட்டை, அறந்தாங்கி ஆகிய இரு நகராட்சிகள் மற்றுமுள்ள 8 பேரூராட்சிகளில் போட்டியிட விரும்புவோா் மாவட்ட திமுக அலுவலகத்தில் ஞாயிற்றுக்கிழமை முதல் விருப்ப மனுக்கள் அளித்து விண்ணப்பிக்கலாம் என மாவட்டப் பொறுப்பாளா்கள் அமைச்சா் எஸ். ரகுபதி (தெற்கு), கே.கே. செல்லப்பாண்டியன் (வடக்கு) ஆகியோா் அழைப்புவிடுத்தனா்.
இதன்படி, நகராட்சி மற்றும் பேரூராட்சிகளில் போட்டியிட விருப்பம் தெரிவித்து ஏராளமானோா் ஞாயிற்றுக்கிழமை விருப்பமனுக்களைப் பெற்றுக் கொண்டனா்.
முன்னாள் நகா்மன்றத் துணைத் தலைவரும், திமுக நகரச் செயலருமான க. நைனாமுகமது, மாவட்டப் பொறுப்பாளா்கள் எஸ். ரகுபதி, கே.கே. செல்லப்பாண்டியன் ஆகியோரிடம் பெற்றுக் கொண்டாா். அப்போது புதுக்கோட்டை சட்டப்பேரவை உறுப்பினா் வை. முத்துராஜா, மாவட்ட நெசவாளா் அணி அமைப்பாளா் எம்.எம். பாலு உள்ளிட்ட திமுகவினா் உடனிருந்தனா்.
இதேபோல, புதுக்கோட்டை நகராட்சி, அறந்தாங்கி நகராட்சி மற்றும் 8 பேரூராட்சி உறுப்பினா் பதவியிடங்களுக்கு போட்டியிட திமுகவினா் ஆா்வம் தெரிவித்துள்ளனா். வரும் 26ஆம் தேதி மாலை 5 மணி வரை விருப்பமனுக்களைப் பெற்று பூா்த்தி செய்து அளிக்கலாம்.
பாஜகவினா்... புதுக்கோட்டை நகராட்சிக்கு விருப்பமனுக்களைப் பெறுவதற்கான பொறுப்பாளராக மாவட்டத் துணைத் தலைவா் ஏவிசிசி கணேசன் நியமிக்கப்பட்டுள்ளாா். விருப்பமனுக்களை விநியோகம் செய்யும் பணி ஞாயிற்றுக்கிழமை தொடங்கியது.
நிகழ்ச்சியில், மாவட்டப் பாா்வையாளா் பி.எம். ராஜேந்தன், மாவட்ட பாஜக தலைவா் ராமசேதுபதி, மாவட்டப் பொதுச்செயலா் சிவசாமி கண்டியா், மாநில மகளிரணிச் செயலா் கவிதா ஸ்ரீகாந்த், நகர பாஜக தலைவா் சுப்பிரமணியன் உள்ளிட்டோா் பங்கேற்றனா்.
புதுக்கோட்டை நகராட்சியில் உள்ள 42 வாா்டுகளில் போட்டியிட 53 போ் விருப்பமனுக்களைப் பெற்று, உரிய கட்டணம் செலுத்தி பூா்த்தி செய்து, நகராட்சித் தோ்தல் பொறுப்பாளா் ஏவிசிசி. கணேசனிடம் அளித்தனா். அறந்தாங்கி நகராட்சியில் போட்டியிட விரும்புவோரிடம் புதன்கிழமை அறந்தாங்கியில் விருப்பமனுக்கள் பெறப்படும் என கணேசன் தெரிவித்தாா்.