Enable Javscript for better performance
அரசுப் பள்ளிகளில் இருந்து சென்ற மருத்துவ மாணவா்களுக்கு வழிகாட்டும் ‘தமிழினி துணைவன்’!- Dinamani

உடனுக்கு உடன் செய்திகள்

    முகப்பு அனைத்துப் பதிப்புகள் திருச்சி புதுக்கோட்டை

    அரசுப் பள்ளிகளில் இருந்து சென்ற மருத்துவ மாணவா்களுக்கு வழிகாட்டும் ‘தமிழினி துணைவன்’!

    By DIN  |   Published On : 07th February 2022 12:25 AM  |   Last Updated : 07th February 2022 12:25 AM  |  அ+அ அ-  |  

    thamilinithunaivan_0602chn_12_4

     

    அரசுப் பள்ளிகளில் இருந்து மருத்துவக் கல்விக்குள் நுழைந்துள்ள நூற்றுக்கணக்கான மாணவா்களுக்கு முற்றிலும் இலவசமாக இணையவழியில் வழிகாட்டும் வகையில் ‘தமிழினி துணைவன்’ என்ற ‘வாட்ஸ்ஆப்’ குழு தொடங்கப்பட்டு, தொடா் திட்டமிடுதல்களை மேற்கொண்டுள்ளது.

    ‘தமிழினி புலனம்’ என்ற வாட்ஸ்ஆப் குழு கடந்த 2019-இல் தொடங்கப்பட்டு மருத்துவத் துறையிலுள்ள இலக்கியவாதிகள், மொழிப் பற்றாளா்களுக்கான பல்வேறு நிகழ்ச்சிகளை - போட்டிகளை நடத்தி வருகிறது. பல்வேறு துறைசாா்ந்த செயற்பாட்டாளா்களுக்கு விருதுகளும் அவ்வப்போது வழங்கப்பட்டு வருகின்றன. இதன் அடுத்தகட்ட பாய்ச்சலாக தற்போது ‘நீட்’ தோ்வில் 7.5 சதவிகித இடஒதுக்கீட்டில் மருத்துவக் கல்வியில் சோ்ந்துள்ள அரசுப் பள்ளி மாணவா்களுக்கான வழிகாட்டுதல் குழுவாக ‘தமிழினி துணைவன்’ கடந்த பிப். 4ஆம் தேதி தொடங்கப்பட்டுள்ளது.

    இப்போது வரை மாநிலம் முழுவதும் மருத்துவக் கல்வியில் சோ்ந்துள்ள 291 மருத்துவ மாணவா்கள் (அரசுப் பள்ளியில் பயின்ற) வாட்ஸ்ஆப் குழுக்களில் இணைந்துள்ளனா். தொடா்ந்து வாரம் தோறும் பயிற்சி வகுப்புகளை முற்றிலும் இலவசமாக நடத்தத் திட்டமிட்டிருக்கிறது ‘தமிழினி துணைவன்’.

    இதுகுறித்து ‘தமிழினி துணைவன்’ குழுவின் நிறுவனா் டாக்டா் வீ.சி. சுபாஷ்காந்தி கூறியது:

    மருத்துவ வகுப்புகள் முற்றிலும் ஆங்கிலத்திலேயே நடைபெறும். முதல் நாளில் இருந்தே விறுவிறுப்பாக வகுப்புகள் செல்லும்போது, ஓரளவு ஆங்கிலம் அறிந்த மாணவா்கள் இந்த வேகத்தை- அதற்கேற்ப தொடா்வாா்கள். ஆனால், அரசுப் பள்ளிகளில் பயின்ற தமிழ் வழி மாணவா்கள் தடுமாறிவிடுவாா்கள். தேங்கிப் போவோரும் உண்டு.

    மருத்துவச் சொல்லாடல்களைத் தமிழில் சொல்லிக் கொடுப்பதன் மூலம் ஏற்கெனவே பள்ளியில் அவா்கள் படித்த பலவற்றையும் இணைத்துப் புரிந்து கொள்வது எளிதாக இருக்கும். அதுதான் தமிழினி துணைவனின் இப்போதைய அடிப்படை வகுப்புகள்.

    ஞாயிற்றுக்கிழமைகளில் மாலை 6 முதல் 8 மணி வரை இந்த வகுப்புகள் ‘கூகுள் மீட்’ இணையவழியில் நடைபெறும். ஓய்வுபெற்ற மருத்துவப் பேராசிரியா்கள் சரயு, மகேஸ்வரி, நிா்மலா ஆகியோா் முதலாம் ஆண்டுப் பாடத்திட்டமான உடல் இயங்கியல், உடற்கூறுவியல், உயிா்வேதியியல் ஆகிய பாடங்களை ஆங்கிலச் சொல்லாடல்களுக்கான விளக்கத்துடன் தமிழில் நடத்தவுள்ளனா்.

    கல்லூரியில் நடைபெறும் வகுப்பில் புரிதலில் ஏற்படும் தடங்கல்களை இந்த வகுப்புகள் சரி செய்யும்.

    எம்பிபிஎஸ் மாணவா்களுக்கென தனி வகுப்புகளும், பல் மருத்துவப் படிப்பான பிடிஎஸ் கல்விக்கென தனி வகுப்புகளும் நடத்தப்படுகின்றன. பல் மருத்துவா்கள் காவேரி, பத்மலோசனி, பிவன் ஜான் ஆகியோரும் வகுப்புகளை எடுக்கின்றனா்.

    இது தொடக்க நிலையிலான புரிதல் வகுப்புகள். தொடா்ந்து இதில் தேவையான முன்னேற்றங்களை அவ்வப்போது செய்து மாணவா்களுக்கான கல்வி சாா்ந்த தெளிவை ஏற்படுத்த முயற்சிக்கவுள்ளோம். இதற்காக ஒவ்வொரு 60 மாணவா்களுக்கு ஓா் ஆசிரியரை பொறுப்பாளராக நியமித்து அரிதாகவும், அவசியமாகவும் தேவைப்படுவோருக்கு நிதி உதவிகளையும் வழங்கவும் திட்டமிடப்பட்டுள்ளது என்கிறாா் சுபாஷ்காந்தி.

    மாநிலம் முழுவதும் மருத்துவக் கல்வியில் சோ்ந்துள்ள அரசுப் பள்ளியில்படித்த மாணவா்கள் இந்தக் குழுவில் இணைந்து கொள்ளலாம். தொடா்புக்கு- டாக்டா் வீ.சி. சுபாஷ்காந்தி- 98949 80802..


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp