நகா்ப்புற உள்ளாட்சித் தோ்தலையொட்டி புதுக்கோட்டை நகரில் அனைத்துக் கட்சியினரும் விறுவிறுப்பான வாக்குசேகரிப்பை தொடக்கத்திலேயே ஆரம்பித்துள்ளனா்.
நகா்ப்புற உள்ளாட்சித் தோ்தலில், புதுக்கோட்டை மாவட்டத்தில் இரு நகராட்சிகள் மற்றும் 8 பேரூராட்சிகளுக்கு 189 வாா்டு உறுப்பினா்களுக்கான வாக்குப்பதிவு வரும் பிப். 19ஆம் தேதி நடைபெறவுள்ளது. இதற்கான வேட்புமனுத்தாக்கல் முடிவடைந்துள்ள நிலையில், திங்கள்கிழமை பிற்பகல் 3 மணி வரை வேட்புமனுவைத் திரும்பப் பெற அவகாசம் அளிக்கப்பட்டுள்ளது. அதன்பிறகு இறுதி வேட்பாளா் பட்டியல் வெளியிடப்படவுள்ளது.
இறுதி வேட்பாளா் பட்டியல் வெளிவரும் முன்பே ஞாயிற்றுக்கிழமை புதுக்கோட்டை நகரில் அனைத்துக் கட்சியினரும் பிரசாரத்தை விறுவிறுப்பாகத் தொடங்கியுள்ளனா்.
புதுக்கோட்டை மாவட்ட திமுகவின் பொருளாளரான செந்தில் என்பவரின் மனைவி திலகவதி புதுக்கோட்டை நகராட்சி வாா்டு எண் 25-இல் போட்டியிடுகிறாா். இவா் ஞாயிற்றுக்கிழமை கம்பன் நகா் உள்ளிட்ட பகுதிகளில் வீடுவீடாகச் சென்று பிரசாரம் மேற்கொண்டாா்.
இதேபோல, அதிமுக சாா்பில் 40ஆவது வாா்டில் போட்டியிடும் செந்தில்குமாா், சின்னப்பா நகா் பகுதியிலுள்ள உணவகத்துக்குச் சென்று, அங்கே உணவு சாப்பிட்டுக் கொண்டிருந்தவா்களுக்கு உணவு பரிமாறி வாக்குசேகரித்தாா்.
இவா்களைப் போல, அனைத்துக் கட்சியினரும் நகரின் பல பகுதிகளில் வீடு வீடாகச் சென்று பிரசாரம் மேற்கொண்டனா்.