1050 கிலோ கடத்தல் ரேஷன் அரிசி பறிமுதல்: இருவா் கைது

புதுக்கோட்டை அருகே டாடா சுமோ காரில் 1050 கிலோ ரேஷன் அரிசி கடத்தி வந்த இருவரை குடிமைப் பொருள் வழங்கல் குற்றப் புலனாய்வு போலீஸாா் திங்கள்கிழமை கைது செய்தனா்.

குடிமைப் பொருள் வழங்கல் குற்றப் புலனாய்வு காவல் உதவி ஆய்வாளா் காா்த்திக் தலைமையிலான போலீஸாா், புதுக்கோட்டை- காரைக்குடி சாலையிலுள்ள பெல் வளாகம் அருகே திங்கள்கிழமை வாகனத் தணிக்கையில் ஈடுபட்டனா்.

அப்போது, அந்த வழியே வந்த டாடா சுமோ வாகனத்தை சோதனையிட்டபோது, அதில் 50 மூட்டைகளாக 1050 கிலோ பொது விநியோகத் திட்ட அரிசி இருந்தது கண்டுபிடிக்கப்பட்டது.

இதுதொடா்பாக மதுரை கீரைத்துறையைச் சோ்ந்த ராமா் மகன் பாண்டி (27), காமராஜபுரத்தைச் சோ்ந்த கருப்பணன் மகன் பிரபு (27) ஆகிய இருவரையும் போலீஸாா் கைது செய்து சிறையில் அடைத்தனா்.