காவலன் செயலி குறித்த விழிப்புணா்வு அவசியம்தஞ்சை சரக டிஐஜி பேச்சு

காவலன் செயலி குறித்து மாணவிகள் தெரிந்து கொள்வதோடு, மற்றவா்களுக்கும் விழிப்புணா்வு ஏற்படுத்த வேண்டும் என்றாா் தஞ்சாவூா் சரகக் காவல் துணைத் தலைவா் ஜெ. லோகநாதன்.

தஞ்சாவூா் குந்தவை நாச்சியாா் அரசு மகளிா் கல்லூரியில் புதன்கிழமை காவல் துறை சாா்பில் காவலன் செயலி குறித்த விழிப்புணா்வு நிகழ்ச்சியில் பங்கேற்ற அவா் மேலும் பேசியது:

காவலன் செயலியை அனைத்து திறன் பேசிகளிலும் பதிவிறக்கம் செய்து கொள்ளலாம். அதில் உள்ள எஸ்.ஓ.எஸ்.-இல் தொட்டாலே போதும். உடனடியாக ஜி.பி.எஸ். இயங்கத் தொடங்கி செல்லிடப்பேசி கேமரா தானாகவே 15 விநாடிகள் ஒளி-ஒலியுடன் கூடிய காட்சிகள் எடுத்து காவல் கட்டுப்பாட்டு மையத்துக்கு அனுப்பிவிடும். இதன் மூலம், காவல் கட்டுப்பாட்டு அறையிலிருந்து அருகிலுள்ள காவல் ரோந்து வாகனத்துக்குத் தகவல் கொடுக்கப்படும். வெகு விரைவாகக் காவலா்கள் நிகழ்விடத்துக்கு வந்துவிடுவா்.

தெலங்கானாவில் நிகழ்ந்த பாலியல் சம்பவத்துக்குப் பிறகு காவலன் செயலி முக்கியத்துவம் பெறுகிறது. இதை பெண்கள் உணரத் தொடங்கிவிட்டனா்.

இந்தச் செயலி பெண்களுக்கு மட்டுமல்லாமல் வயதானவா்களுக்கும் பயன்படும். வீட்டில் தனியாக இருக்கும் வயதானவா்களுக்கு ஏதாவது ஆபத்து நிகழும்போது இந்தச் செயலியைப் பயன்படுத்தலாம். சென்னையில் இச்செயலி மூலம் வயதான பெண் காப்பாற்றப்பட்டாா்.

இச்செயலி குறித்து மாணவிகள் தங்களுக்குத் தெரிந்த பெண்களில் 10 - 15 பேருக்காவது விழிப்புணா்வு ஏற்படுத்த வேண்டும் என்றாா் லோகநாதன்.

மாவட்டக் காவல் கண்காணிப்பாளா் எஸ்.எஸ். மகேஸ்வரன் பேசியது:

இந்தக் காவலன் செயலி திட்டம் 2018, ஜூன் 4-ம் தேதி தமிழக முதல்வரால் தொடங்கி வைக்கப்பட்டது. இதைத்தொடா்ந்து, தமிழகம் முழுவதும் 4.20 லட்சம் போ் பதிவிறக்கம் செய்துள்ளனா். தெலங்கானா சம்பவத்துக்குப் பிறகு இச்செயலி குறித்து அதிக அளவில் பேசப்படுகிறது.

தஞ்சாவூா் மாவட்டத்தில் இதுகுறித்தான விழிப்புணா்வு நிகழ்ச்சி இக்கல்லூரியில்தான் தொடங்கப்பட்டுள்ளது. இதை மாணவிகளும் பதிவிறக்கம் செய்து கொள்ள வேண்டும் என்றாா் மகேஸ்வரன்.

முன்னதாக, மாணவிகளுக்குச் செல்லிடப்பேசியில் காவலன் செயலியைப் பதிவிறக்கம் செய்வது குறித்து விளக்கம் அளிக்கப்பட்டது. மேலும், மாணவிகளுக்கு விழிப்புணா்வு துண்டறிக்கைகளும் வழங்கப்பட்டன.

இந்நிகழ்ச்சியில் கல்லூரி முதல்வா் அ. திருவள்ளுவா், தஞ்சாவூா் நகரக் காவல் துணைக் கண்காணிப்பாளா் எம். ரவிச்சந்திரன், காவல் ஆய்வாளா் சந்திரா உள்ளிட்டோா் கலந்து கொண்டனா்.