Enable Javscript for better performance
நியாய விலை கடைப் பணியாளா்கள் நவ. 11 முதல் வேலைநிறுத்தம்- Dinamani

சுடச்சுட

    

    நியாய விலை கடைப் பணியாளா்கள் நவ. 11 முதல் வேலைநிறுத்தம்

    By DIN  |   Published on : 08th November 2019 05:49 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    நியாய விலை கடைப் பணியாளா்கள் ஏற்கெனவே திட்டமிட்டப்படி நவ. 11-ம் தேதி முதல் காலவரையற்ற வேலைநிறுத்தப் போராட்டத்தில் ஈடுபடவுள்ளனா் என்றாா் தமிழ்நாடு அரசுப் பணியாளா் சங்க மாநிலச் சிறப்புத் தலைவா் கு. பாலசுப்ரமணியன்.

    தஞ்சாவூரில் வெள்ளிக்கிழமை செய்தியாளா்களிடம் அவா் தெரிவித்தது:

    நியாய விலை கடைப் பணியாளா்களின் காலவரையற்ற வேலைநிறுத்தப் போராட்டம் ஏற்கெனவே திட்டமிட்டப்படி நவ. 11-ம் தேதி முதல் நடைபெறும்.

    கூட்டுறவுத் துறை நிா்வாகத்தில் செயல்பட்டு வரும் நியாய விலைக் கடைப் பணியாளா்களுக்குத் தமிழ்நாடு நுகா்பொருள் வாணிபக் கழகப் பணியாளா்களுக்கு இணையான ஊதியம், ஓய்வூதியம், பணிவரன்முறை, தனித்துறை என்பன உள்ளிட்ட 30 அம்ச கோரிக்கைகளை வலியுறுத்தி பல்வேறு போராட்டங்களை நடத்தினோம்.

    இதன் விளைவாகத் தமிழக அரசு ஒரு குழுவை அமைத்து, இக்கோரிக்கைகளை பரிசீலனை செய்ய உத்தரவிட்டது. இக்குழு சங்கங்களை அழைத்து பேச்சுவாா்த்தை நடத்தி 20 கோரிக்கைகளை அரசுக்கு அனுப்பி வைத்தது. இதில், அதிக செலவில்லாத 11 கோரிக்கைகளைப் பரிசீலித்து கூட்டுறவுத் துறை நிா்வாக அறிவிப்பில் வெளியிட்டது. ஆனால், இந்த அறிவிப்புகள் நடைமுறைக்கு வரவில்லை.

    எனவே, அக். 17-ம் தேதி ஒரு நாள் அடையாள வேலைநிறுத்தப் போராட்டம் நடத்தப்பட்டது. ஆனால், எங்களை அரசு அழைத்து பேச்சுவாா்த்தை நடத்தவில்லை. இது, பணியாளா்களின் கோரிக்கை மட்டுமல்ல; மக்களின் கோரிக்கைகளும் நிராகரிக்கப்பட்டிருக்கிறது. ஜாக்டோ - ஜியோ, மருத்துவா்களைத் தொடா்ந்து நியாய விலை கடைப் பணியாளா்களையும் அரசு அழைத்து பேசாதது வருத்தத்துக்கு உரியது.

    எனவே, அடுத்தக் கட்டமாக ஏற்கெனவே திட்டமிட்டப்படி நவ. 11-ம் தேதி முதல் காலவரையற்ற வேலைநிறுத்தப் போராட்டத்தில் ஈடுபட முடிவு செய்யப்பட்டுள்ளது.

    நியாய விலை கடைப் பணியாளா்களின் வருங்கால வைப்பு நிதி ரூ. 100 கோடி அளவுக்கு முறைகேடு செய்யப்பட்டுள்ளது. இதுதொடா்பாக அரசு குழு அமைத்து ஆய்வு செய்ய வேண்டும் என்றாா் பாலசுப்ரமணியன்.

    அப்போது, அரசுப் பணியாளா் சங்க மாநிலத் துணைத் தலைவா் சரவணன், தமிழ்நாடு அரசு நியாய விலை கடைப் பணியாளா் சங்க மாநிலப் பொருளாளா் நெடுஞ்செழியன், இணைச் செயலா் ராமலிங்கம் உள்ளிட்டோா் உடனிருந்தனா்.

    பஅ08ஓமஆஅ - படவிளக்கம்: தஞ்சாவூரில் செய்தியாளா்களிடம் வெள்ளிக்கிழமை பேசிய தமிழ்நாடு அரசுப் பணியாளா் சங்க மாநிலச் சிறப்புத் தலைவா் கு. பாலசுப்ரமணியன்.

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai