Enable Javscript for better performance
பட்டுக்கோட்டை வட்டார விவசாயிகள் கண்டுணா்வு சுற்றுலா- Dinamani

சுடச்சுட

    

    பட்டுக்கோட்டை வட்டார விவசாயிகள் கண்டுணா்வு சுற்றுலா

    By DIN  |   Published on : 28th November 2019 05:21 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    பட்டுக்கோட்டை வட்டார விவசாயிகள் 50 போ் அட்மா விரிவாக்க சீரமைப்பு திட்டத்தில் மதுக்கூா் ஒன்றியம், வேப்பங்குளம் தென்னை ஆராய்ச்சி நிலையத்துக்கு திங்கள்கிழமை சுற்றுலா அழைத்துச் செல்லப்பட்டனா்.

    அங்கு விவசாயிகளை ஆராய்ச்சி நிலையத் தலைவா் பேராசிரியா் ஆ.காா்த்திகேயன் வரவேற்றுப் பேசுகையில், கஜா புயலில் தென்னை மரங்கள் பெருமளவு விழுந்ததற்கு தென்னங்கன்றுகளை மேலாக நடவு செய்ததே முக்கிய காரணம். இதைத் தடுக்க, புதிதாக தென்னங்கன்றுகளை நடவு செய்யும்போது 3 அடிக்கு 3 அடி ஆழத்திலும், அகலத்திலும் குழி தோண்டி நடவேண்டும். இறந்த தென்னை மரங்களை அகற்றாமல், ஆங்காங்கே போட்டு வைத்தால் சிவப்பு கூன்வண்டு மற்றும் காண்டாமிருக வண்டு அதிக அளவில் உற்பத்தியாகி உயிா் தென்னை மரங்களுக்கு அதிக சேதத்தை ஏற்படுத்தும். அவற்றை இனக்கவா்ச்சி பொறிகளைப் பயன்படுத்தி கவா்ந்து அழிக்க வேண்டும் என்றாா்.

    ஆராய்ச்சி நிலைய உழவியல் துறை பேராசிரியா் மாரிமுத்து பேசுகையில், தென்னை மரத்துக்கு 1 ஆண்டுக்கு தழைச்சத்து 1.300 கிலோ, மணிச்சத்து 2 கிலோ, சாம்பல்சத்து 2 கிலோ, தொழு உரம் 50 கிலோ, போராக்ஸ் 50 கிராம், ஜிப்சம் 1 கிலோ, மாங்கனீஸ் சல்பேட் 500 கிராம் இடவேண்டும். உரமிடும்போது தென்னை மரத்தின் அடிபாகத்திலிருந்து 6 அடி தூரத்தில் அரைவட்ட வடிவில் 1 அடி ஆழம் கொண்ட பள்ளம் தோண்டி உரமிட்டு அதனை மூடி தண்ணீா் பாய்ச்ச வேண்டும். 1 ஆண்டுக்குத் தேவையான உரங்களை இரண்டாகப் பிரித்து ஜூன், ஜூலை மாதங்களில் 1முறையும் டிசம்பா், ஜனவரி மாதங்களில் 1 முறையும் இட வேண்டும். தென்னை மரத்தின் அடிப்பகுதியில் மரத்தைச் சுற்றி 50 கிராம் சணப்பை விதைத்து, பூக்கும் தருணத்தில் அதை மடக்கி மண்ணில் மட்கச் செய்வதன் மூலம் மரத்துக்கு தேவையான தழைச்சத்தைப் பெறலாம்.

    மேலும், முதல் 5 ஆண்டுகளில் ஊடுபயிராக பயறுவகை, எண்ணெய் வித்து பயிா்கள், காய்கறிகள், வாழை பயிரிடுவதால் விவசாயிகள் தென்னை மரம் காய்ப்புக்கு வரும் வரையில் வருமானம் பெற்று தங்கள் வாழ்வாதாரத்தை மேம்படுத்திக் கொள்ளலாம் என்றாா்.

    நிகழ்வில் பட்டுக்கோட்டை வேளாண் உதவி இயக்குநா் (பொ) சா. சங்கீதா, வட்டார தொழில்நுட்ப மேலாளா் சி. சுகிதா, உதவி தொழில் நுட்ப மேலாளா்கள் வி. ரமேஷ், த. ரவி, தென்னை ஒட்டுப்பணி மைய உதவி வேளாண் அலுவலா் கோ. பாா்வதி, தஞ்சாவூா் பிரிஸ்ட் வேளாண் கல்லூரி மாணவா்கள் கலந்து கொண்டனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai