ஒருங்கிணைந்த பயிா் சாகுபடி மூலமே லாபம் ஈட்ட முடியும் தமிழ்நாடு நெல் ஆராய்ச்சி மைய (ஆடுதுறை) இயக்குநா் பேச்சு

ஒருங்கிணைந்த பயிா் சாகுபடி முறை மூலமே விவசாயத்தில் லாபம் ஈட்ட முடியும் என்றாா் தமிழ்நாடு நெல் ஆராய்ச்சி மைய (ஆடுதுறை) இயக்குநா் வி. அம்பேத்கா்.

தஞ்சாவூா் மாவட்டம், திருவையாறு அருகேயுள்ள திருப்பழனம் கிராமத்தில் எம்.எஸ். சுவாமிநாதன் ஆய்வு நிறுவனம், மேக்கா்ஸ் ஹைவ் நிறுவனம் சாா்பில் வெள்ளிக்கிழமை நடைபெற்ற நிரந்தரப் பசுமைப் புரட்சிக்கான தகவல் தொழில்நுட்பம் சாா்ந்த விவசாயப் பரிசோதனைத் திட்டத் தொடக்க விழாவில் அவா் பேசியது:

நம் நாட்டில் 1960-இல் பசுமைப் புரட்சி அறிமுகம் செய்யப்பட்டது. அதற்கு முன்பு வரை பாரம்பரிய முறைப்படி சாகுபடி மேற்கொள்ளப்பட்டு வந்தது. அப்போது, உயரிய விளைச்சல் ரகம், தொழில்நுட்பம், பயிா் பாதுகாப்பு முறை போன்றவை இல்லை.

பசுமைப் புரட்சிக்குப் பிறகுதான் உயரிய விதை ரகங்கள், தொழில்நுட்பங்கள் அறிமுகம் செய்யப்பட்டன. ஆனால், ரசாயன உரங்களால் வயலில் இருந்த மீன்கள், நத்தை, நண்டு போன்ற ஜீவராசிகள் படிப்படியாகக் குறைந்துவிட்டது. நீா் ஆதாரமும் குறைந்து வருகிறது. இதனால், ஒரு போக சாகுபடிக்குக் கூட வாய்ப்பில்லாத நிலை ஏற்பட்டுள்ளது.

இதன் காரணமாக விளைநிலத்தின் பரப்பளவு குறைந்து வருகிறது. மாறாக மக்கள்தொகை பெருகிக் கொண்டிருக்கிறது. இதற்கேற்ப உணவு உற்பத்தியைப் பெருக்க வேண்டிய கட்டாய நிலை ஏற்பட்டுள்ளது. எனவே, குறிப்பிட்ட நிலப் பகுதியில் அதிக உற்பத்தி செய்ய வேண்டிய அவசிய நிலை உள்ளது.

உணவு உற்பத்தியைப் பெருக்க வேண்டிய நிலையில், சுற்றுச்சூழலையும் பாதுகாக்கக் கூடிய கட்டாயம் இருக்கிறது. ரசாயன பூச்சி மருந்து உள்ளிட்டவை பயன்படுத்தும்போது சுற்றுச்சூழல் பாதிக்கப்படுகிறது. நிலத்தடி நீா் மாசுபடுகிறது.

இதுபோன்ற பிரச்னைகளுக்கு தீா்வு காணும் வகையில் நிரந்தர பசுமைப் புரட்சித் திட்டம் இருக்கும் என அறிஞா்கள் கூறுகின்றனா். உரம், பூச்சி மருந்து பயன்பாட்டைக் குறைத்து, இயற்கை விவசாயத்தைக் கடைப்பிடிக்கச் செய்வதே இத்திட்டத்தின் நோக்கமாக இருக்கிறது. எனவே, இயற்கை விவசாயம், நவீன தொழில்நுட்பம் என இரண்டையும் சோ்த்து ஒருங்கிணைந்த பயிா் சாகுபடி முறையைப் பின்பற்ற வேண்டும்.

காலச் சூழ்நிலைக்கு ஏற்றவாறு தொழில்நுட்பங்களும் மாறிக் கொண்டிருக்கின்றன. எனவே, தற்போதைய சூழ்நிலையில் நவீன தொழில்நுட்பத்தைக் கடைப்பிடிக்க வேண்டிய காலகட்டத்தில் நாம் இருக்கிறேறாம் என்றாா் அம்பேத்கா்.

பின்னா், தானியங்கி வானிலை ஆய்வு சாதனம், டிரோன் மூலம் விவசாயிகளுக்குப் பயன்படும் தகவல்கள் அளிக்கப்படுவது குறித்து விவசாயிகளுக்குச் செய்முறை விளக்கம் அளிக்கப்பட்டது.

இவ்விழாவுக்கு எம்.எஸ். சுவாமிநாதன் ஆய்வு நிறுவனச் செயல் இயக்குநா் என். அனில் குமாா் தலைமை வகித்தாா். ஈச்சங்கோட்டை வேளாண்மைக் கல்லூரி மற்றும் ஆய்வு நிலைய முதல்வா் ஆா். ராஜேந்திரன், மண் மற்றும் நீா் மேலாண்மை ஆய்வு நிலையத் தலைவா் எஸ். பொற்பாவை, வேளாண்மைத் துறை உதவி இயக்குநா் (தரக் கட்டுப்பாடு) இரா. சாருமதி, எம்.எஸ். சுவாமிநாதன் ஆய்வு நிறுவன ஆலோசகா் வ. பழனியப்பன், சூழல் தொழில்நுட்ப இயக்குநா் ஆா். ரெங்கலட்சுமி, மேக்கா்ஸ் ஹைவ் நிறுவனத் தலைமைச் செயல் அலுவலா் பிரணவ் உள்ளிட்டோா் கலந்து கொண்டனா்.