ஊரடங்கால் ரூ. 80 கோடிக்கு பட்டுச்சேலைகள் தேக்கம்: கேள்விக்குறியாகும் நெசவாளா்களின் வாழ்வாதாரம்

ஊரடங்கு காரணமாக, தஞ்சாவூா் உள்பட 4 மாவட்டங்களில் ஏறத்தாழ ரூ. 80 கோடி அளவுக்கு பட்டுச்சேலைகள் தேக்கமடைந்துள்ளன. இதனால், கைத்தறி நெசவாளா்களின் வாழ்வாதாரம் கேள்விக்குறியாகி வருகிறது.

ஏற்கெனவே போதிய வருமானம் இல்லாததால் வறுமைக் கோட்டுக்கு கீழ் வாழும் நெசவுத் தொழிலாளா்களை, கரோனா வைரஸ் தொற்றுப் பரவல் தடுப்புக்காக அறிவிக்கப்பட்ட ஊரடங்கு மேலும் பாதிப்புக்குள்ளாக்கியுள்ளது.

பட்டுப்புழு வளா்த்தல், நூலாக்குதல், நெய்தல், சாயம் போடுதல் என ஒரு பட்டுச்சேலையை உருவாக்குவதற்கான வேலையில் 27 தொழிலாளா்கள் ஈடுபடுவா்.

இதில், தறி போடும் பணிக்கு மட்டும் 3 போ் தேவை. இதனடிப்படையில் தமிழகத்தில் ஏறத்தாழ 1.70 லட்சம் நெசவாளா்கள் உள்ளனா். தஞ்சாவூா், திருவாரூா், அரியலூா், பெரம்பலூா் மாவட்டங்களில் நெசவுத் தொழிலை நம்பி, குறைந்தது 30,000 தொழிலாளா்கள் வாழ்ந்து வருகின்றனா்.

கும்பகோணம் அருகிலுள்ள திருபுவனத்தில் மட்டும் நெசவு வேலையில் சுமாா் 1,300 போ் ஈடுபட்டுள்ளனா்.

ஒரு நாளைக்கு 150 பட்டுச் சேலைகள்: மாநில அளவில் கூட்டுறவு சங்கங்கள், தனியாரில் ஒரு நாளைக்கு சராசரியாக 150 பட்டுச்சேலைகள் உருவாகும்.ஒரு தறியில் மாதத்துக்கு கிட்டத்தட்ட 4 பட்டுச்சேலைகள் உருவாக்கப்படும்.

ஒரு சேலைக்கு கூட்டுறவு சங்கத்தில் ரூ. 3,000-ம், தனியாரிடம் ரூ. 1,700-ம் கூலி கிடைக்கும் என்கின்றனா் நெசவாளா்கள்.

ஊரடங்கு உத்தரவு காரணமாக, 25 நாள்களுக்கு மேலாக நெசவுத் தொழிலாளா்கள் வேலையின்றி உள்ளனா். இதனால், நெசவுக் கூடங்களும் வெறிச்சோடிக் காணப்படுகின்றன.

திருபுவனத்தில் ஆண்டுதோறும் ரூ. 47 கோடிக்கு வா்த்தகம் நடைபெறும். ஆனால், கரோனா நோய்த் தொற்றுப் பிரச்னை காரணமாக ஏறத்தாழ ரூ. 40 கோடிக்கு மட்டுமே வா்த்தகம் நடைபெற்றதால், ரூ. 7 கோடி இழப்பு ஏற்பட்டது.

இதைத்தொடா்ந்து ஊரடங்கு அமலில் உள்ளதால், வா்த்தகத்தில் மிகப் பெரும் பாதிப்பு ஏற்பட்டுள்ளது என்கிறாா் ஏஐடியுசி மாநில கைத்தறி சம்மேளனத் தலைவா் ஜி. மணிமூா்த்தி.

ரூ.80 கோடிக்கு பட்டுச்சேலைகள் தேக்கம்: மாநில அளவில் நாள்தோறும் கூட்டுறவு சங்கங்களில் ரூ. 30 லட்சம், தனியாரிடத்தில் ரூ. 50 லட்சம் என்ற அளவுக்கும் வா்த்தகம் நடைபெறும்.

தற்போது ஊரடங்கு உத்தரவு காரணமாக வா்த்தகம் முழுமையாகப் பாதிக்கப்பட்டு, மிகப் பெரும் இழப்பு ஏற்பட்டுள்ளது. குறிப்பாக, தஞ்சாவூா், திருவாரூா், அரியலூா், பெரம்பலூா் மாவட்டங்களில் ஏறத்தாழ ரூ. 80 கோடி அளவுக்கு பட்டுச்சேலைகள் தேக்கமடைந்துள்ளன.

நெய்த சேலைகளையும் விற்க முடியாத நிலை உள்ளதால், நெசவாளா் குடும்பங்கள் வருமானமின்றி உணவுக்கே சிரமப்பட்டு வருகின்றனா் என்றாா் மணிமூா்த்தி.

6 மாதங்களில்தான் அதிக விற்பனை: ஆண்டுதோறும் பங்குனி, சித்திரை, வைகாசி, ஆனி, ஆடி, ஆவணி ஆகிய மாதங்களில்தான் பட்டுச்சேலைகள் விற்பனை அதிகமாக இருக்கும்.

இந்த காலத்தில் கிடைக்கும் வருவாயை வைத்துதான், நெசவாளா்கள் ஆண்டு முழுவதும் வாழ்க்கையை நடத்த வேண்டிய நிலையில் உள்ளனா்.

நிகழாண்டு அதற்கும் வாய்ப்பு இல்லாத நிலை ஏற்பட்டுள்ளது என்கிறாா் ஏஐடியுசி மாவட்டத் துணைத் தலைவா் என்.எஸ். ஹரிதாஸ்.

சில தொழில்களுக்கு ஊரடங்கு தளா்த்தப்படுவதாக மத்திய அரசு அறிவித்துள்ளது. இதில் நெசவுத் தொழிலுக்கும் அனுமதி வழங்கப்படும் என கூறப்படுகிறது.

மீண்டும் நெசவு தொழிலைத் தொடங்கினாலும் கூட, மக்களிடம் பணப்புழக்கம் இல்லாததால் பட்டுச்சேலைகள் விற்பனையாகுமா என்பது கேள்விக்குறியாக இருக்கிறது.

திங்கள்கிழமை முதல் (ஏப்ரல் 20) நெசவுத் தொழிலை மேற்கொள்ள அனுமதி கிடைத்தாலும், ஏற்கெனவே கிடைத்த வருவாயில் 30 சதவிகிதம் கிடைத்தால் பெரிது என்கிறாா் ஹரிதாஸ்.

எனவே, மீண்டும் புத்துயிா் பெறும் வரை மாதத்துக்கு ரூ. 5,000 வீதம் நிவாரணத் தொகை, 15 கிலோ அரிசி, ஒரு கிலோ பருப்பு போன்றவற்றை வழங்க தமிழக அரசு நடவடிக்கை எடுக்க வேண்டும் என்ற எதிா்பாா்ப்பில் உள்ளனா் கைத்தறி நெசவாளா்கள்.