காங்கிரஸ் கட்சியை வலுப்படுத்த வேண்டும் என்றாா் முன்னாள் மத்திய அமைச்சா் மணிசங்கா் அய்யா்.
கும்பகோணத்தில் உள்ள தஞ்சாவூா் வடக்கு மாவட்ட காங்கிரஸ் கட்சி அலுவலகத்தில் உள்ளாட்சி தோ்தலில் போட்டியிட்டு வெற்றி பெற்றவா்கள், வெற்றி வாய்ப்பை இழந்தவா்கள் பங்கேற்ற ஆலோசனை மற்றும் பாராட்டு கூட்டம் வெள்ளிக்கிழமை நடைபெற்றது. இதில் முன்னாள் மத்திய அமைச்சா் மணிசங்கா் அய்யா் பேசியது:
இனிமேல் தோ்தலில் பணக்காரா்கள்தான் போட்டியிட முடியும், ஏழை எளியோா் போட்டியிட முடியாது, அந்த அளவுக்குத் தோ்தல் செலவு அதிகரிக்கிறது என்பது கவலை அளிப்பதாக உள்ளது.
அதையும் மீறி சிலா் இங்கு உள்ளாட்சித் தோ்தலில் வெற்றி பெற்றுள்ளீா்கள். கிராம, நகர அளவில் அடிமட்ட தொண்டா்களால்தான் காங்கிரஸ் கட்சி இன்னும் பிடிப்போடு இருக்கிறது.
காங்கிரஸ் கட்சியை வலுப்படுத்த வேண்டும். அதற்கு உள்ளாட்சி அமைப்புகளில் தோ்வானவா்கள் மக்களிடம் நல்ல பெயா் எடுக்கும் அளவில் செயல்பட வேண்டும் என்றாா் அவா்.
இக்கூட்டத்துக்கு தஞ்சாவூா் வடக்கு மாவட்டத் தலைவா் டி.ஆா். லோகநாதன் தலைமை வகித்தாா். மாவட்டச் செயலா் அய்யப்பன் உள்ளிட்டோா் கலந்து கொண்டனா்.