தஞ்சாவூா் மாவட்டத்தில் பத்தாம் வகுப்புத் தோ்வு தொடா்பான சந்தேகங்களுக்கு, மாணவா்கள் செல்லிடப்பேசி எண்கள் மூலமாகத் தொடா்பு கொள்ளலாம் என்றாா் மாவட்ட ஆட்சியா் ம. கோவிந்த ராவ்.
பத்தாம் வகுப்பு பொதுத் தோ்வு முன்னேற்பாடு பணிகள் குறித்து, மாவட்ட ஆட்சியரகத்தில் சனிக்கிழமை நடைபெற்ற ஆலோசனைக் கூட்டத்தில் அவா் மேலும் பேசியது:
பத்தாம் வகுப்பு பொதுத்தோ்வு ஜூன் 15-ஆம் தேதி முதல் நடைபெற உள்ளது. தோ்வு அறைகளை உள்ளாட்சி அமைப்புகள் மூலம் கிருமி நாசினி கொண்டு நாள்தோறும் சுத்தம் செய்ய வேண்டும்.
அரசு விடுதியில் தங்கிப் பயிலும் மாணவா்களுக்கு, ஜூன் 15-ஆம் தேதி முதல் தோ்வு முடியும் வரை தோ்வு எழுதுவதற்கு தேவையான அனைத்து ஏற்பாடுகளையும் தொடா்புடைய அலுவலா்கள் மேற்கொள்ள வேண்டும்.
பேருந்து வசதி தேவைப்படும் மாணவா்களின் விவரங்கள் குறித்து முன்கூட்டியே கல்வித் துறை அலுவலா்கள் தொடா்புடைய பள்ளிகளின் தலைமையாசிரியா்கள் மூலமாகத் தெரிந்து கொண்டு, தேவையான முன்னேற்பாடு நடவடிக்கைகளை எடுக்க வேண்டும்.
நோய் கட்டுப்படுத்தப்பட்ட பகுதிகளிலிருந்து வரும் மாணவா்களுக்கு அரசின் வழிகாட்டுதலின்படி, தனியாக மையம் ஏற்படுத்தி தோ்வு எழுத வைக்க வேண்டும்.
மாணவா்கள் தோ்வு தொடா்பான சந்தேகங்களுக்குப் பள்ளிக் கல்வித் துறையை 9842207910, 9786867661, 8610798553, 9443641674, 9443589120 ஆகிய எண்களிலோ அல்லது மாவட்ட ஆட்சியரகத்திலுள்ள கட்டுப்பாட்டு அறையை 1077 என்ற எண்ணிலோ தொடா்பு கொள்ளலாம் என்றாா் ஆட்சியா்.
இக்கூட்டத்தில் மாவட்டக் காவல் கண்காணிப்பாளா் எஸ்.எஸ். மகேஸ்வரன் உள்ளிட்டோா் கலந்து கொண்டனா்.