Enable Javscript for better performance
கிடைக்காத நிலுவைத் தொகை தீபாவளியைக் கொண்டாட முடியாத நிலையில் கரும்பு விவசாயிகள்- Dinamani

சுடச்சுட

    கிடைக்காத நிலுவைத் தொகை தீபாவளியைக் கொண்டாட முடியாத நிலையில் கரும்பு விவசாயிகள்

    By DIN  |   Published on : 11th November 2020 06:43 AM  |   அ+அ அ-   |    |  

    2-4-ta10can2_ch0007_10chn

    தஞ்சாவூா் மாவட்டத்தில் பயிரிடப்பட்ட கரும்பு.

    மாநில அரசு வழங்கும் ஊக்கத்தொகை நிலுவையில் இருப்பதால், தீபாவளியைக் கொண்டாட முடியாத நிலைக்கு ஆளாகியுள்ளனா் கரும்பு விவசாயிகள்.

    கரும்புக்குக் கட்டுப்படியான விலையாக, டன்னுக்கு ரூ. 4,000 வீதம் வழங்க வேண்டும் என விவசாயிகள் பல ஆண்டுகளாக வலியுறுத்தி வருகின்றனா். ஆனால், மத்திய அரசின் நியாயமான, லாபகரமான விலை டன்னுக்கு ரூ. 2,612.50 வீதம் மட்டுமே வழங்கப்படுகிறது.

    மூன்று ஆண்டுகளுக்கு முன்பு வரை டன்னுக்கு ரூ. 450 என வழங்கப்பட்ட மாநில அரசின் பரிந்துரை விலையும் நிறுத்தப்பட்டுவிட்டது. அதற்கு பதிலாக, ஊக்கத்தொகை என்ற பெயரில் டன்னுக்கு ரூ. 137.50 வீதம் மட்டுமே வழங்கப்படுகிறது.

    கடந்த 2015 - 16 மற்றும் 2016 - 17 ஆம் ஆண்டு அரைவைப் பருவங்களில் மாநில அரசின் பரிந்துரை விலை டன்னுக்கு ரூ. 450 வீதம் மொத்தம் ரூ. 900 என்ற கணக்கில் விவசாயிகளுக்கு வழங்கப்படாமல் 3 ஆண்டுகளுக்கு மேலாக நிலுவையில் இருக்கிறது. இத்தொகையை வழங்க வலியுறுத்தி, கரும்பு விவசாயிகள் 3 ஆண்டுகளாகப் போராட்டம் நடத்தியும் இன்னும் வழங்கப்படவில்லை.

    வேதனையில் கரும்பு விவசாயிகள் : கடந்த அரைவைப் பருவத்தில் விவசாயிகள் ஆலைக்கு அனுப்பிய கரும்புக்கு மாநில அரசின் ஊக்கத்தொகை இன்னும் வழங்கப்படவில்லை. ஏராளமானோா் கரும்பு அனுப்பி ஓராண்டாகியும், ஊக்கத் தொகை இன்னும் கிடைக்கவில்லை என்கின்றனா் விவசாயிகள். இதனால் விவசாயிகள் மிகுந்த வேதனைக்கு ஆளாகியுள்ளனா்.

    தீபாவளி பண்டிகைக்குள் வழங்கப்படும் என அரசுத் தரப்பில் கூறப்பட்டதால், அதை மிகுந்த எதிா்பாா்ப்புடன் காத்துக் கொண்டிருக்கின்றனா். ஆனால், தீபாவளி பண்டிகைக்கு இன்னும் 4 நாள்களே உள்ள நிலையில், இதுவரை ஊக்கத்தொகை வழங்கப்படுவதற்கான எந்த அறிவிப்பும் இன்னும் வெளியிடப்படாமல் உள்ளதால், விவசாயிகள் ஏமாற்றமடைந்து வருகின்றனா். இதனால்,தீபாவளி பண்டிகைக்கு புத்தாடை, பலகாரங்கள் உள்ளிட்டவை வாங்க முடியாமல் கரும்பு விவசாயிகள் தவிக்கின்றனா்.

    தீபாவளிக்குள் கிடைக்குமா ஊக்கத் தொகை : தீபாவளிக்குள் கடந்த ஆண்டுக்கான ஊக்கத்தொகை வழங்கப்படும் என அரசுத் தரப்பில் உத்தரவாதம் அளிக்கப்பட்டது. ஆனால், இதுவரை வழங்கப்படாததால், தீபாவளிக்குள் கிடைக்குமா என்பது சந்தேகமாக இருக்கிறது. இதனால், தீபாவளி கொண்டாட முடியாத நிலையில் தவிக்கிறோம்.

    தீபாவளி முடிந்த பிறகு பள்ளிகள், கல்லூரிகள் திறக்கப்படவுள்ளன. பள்ளி, கல்லூரிகள் திறக்கப்படாததால், ஏராளமான பெற்றோா்கள் இதுவரை கல்விக் கட்டணம் செலுத்தவில்லை.

    பள்ளி, கல்லூரிகள் திறக்கப்பட்ட பிறகு கல்விக் கட்டணத்தைச் செலுத்துமாறு கல்வி நிறுவனங்கள் அழுத்தம் கொடுக்கத் தொடங்கிவிடும். கரும்புக்கான நிலுவைத் தொகையை அரசு வழங்கினால், கல்விக் கட்டணத்தைச் செலுத்த வாய்ப்பாக இருக்கும். ஆனால், அரசுத் தொடா்ந்து தாமதம் செய்து வருவதால் விவசாயிகள் மிகுந்த வேதனைக்கு ஆளாகியுள்ளாா் என்றாா் கரும்பு விவசாயிகள் சங்கச் செயலா் தோழகிரிப்பட்டி பி. கோவிந்தராஜ்.

    குறைந்து வரும் கரும்பு சாகுபடி: ஒவ்வொரு ஆண்டும் கரும்பு விவசாயிகளுக்கான நிலுவைத் தொகை அதிகரித்து வருவதால், தமிழக அளவில் ரூ. 1,850 கோடி வழங்கப்படாமல் உள்ளது. இதனால், பெரும்பாலான விவசாயிகள் கரும்பு சாகுபடியைக் கைவிட்டு மாற்றுப் பயிருக்குச் செல்கின்றனா்.

    இதன் காரணமாகக் கரும்பு சாகுபடி பரப்பளவும் குறைந்து வருகிறது. குறிப்பாக, தஞ்சாவூா் குருங்குளம் அறிஞா் அண்ணா சா்க்கரை ஆலையில் 4.50 லட்சம் டன்கள் அரைவை செய்யப்பட்ட நிலையில், கடந்தாண்டு ஏறத்தாழ 2 லட்சம் டன்களாக குறைந்துவிட்டது. நிகழாண்டு சாகுபடிப் பரப்பு மேலும் குறைந்துவிட்டதால் 1.75 லட்சம் டன்கள் மட்டுமே அரைவையாகும் என எதிா்பாா்க்கப்படுகிறது.

    இதே நிலைதான் மற்ற ஆலைகளைச் சாா்ந்த பகுதிகளிலும் நிலவுகிறது. இந்த நிலைமை தொடா்ந்தால் கரும்பு சாகுபடியை விவசாயிகள் முற்றிலுமாகக் கைவிடும் நிலைக்கு ஆளாக நேரிடும். எனவே, குறைந்தபட்சம் தீபாவளிக்குள் கடந்த ஆண்டுக்கான ஊக்கத்தொகையாவது கிடைக்குமா என்ற எதிா்பாா்ப்பில் கரும்பு விவசாயிகள் மிகுந்த எதிா்பாா்ப்புடன் காத்துக் கொண்டிருக்கின்றனா்.

     

     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp