விக்கிரவாண்டி-தஞ்சாவூா் புதிய சாலைப் பணிக்காக, கும்பகோணம் அருகிலுள்ள சோழன்மாளிகை கிராமத்திலுள்ள சோழா் காலச் சுடுமண் பொருள்கள் மூடப்பட்டு வருகின்றன.
விக்கிரவாண்டி - கும்பகோணம் இடையே சாலை விரிவாக்கமும், கும்பகோணம் - தஞ்சாவூா் இடையே புதிய புறவழிச்சாலையும் அமைக்கப்பட்டு வருகிறது. இதில் கும்பகோணத்திலிருந்து சோழன்மாளிகை கிராமத்தின் வழியாக புதிய சாலை அமைக்கும் பணி முழு வீச்சில் நடைபெற்று வருகின்றன.
இப்பணியால் சோழன்மாளிகை பகுதியில் சாலை அமைக்கும் இடங்களில் ஏராளமான பழைமையான கட்டுமானப் பொருள்கள், மண் ஓடுகள், மண்பாண்டங்கள், உறை கிணறுகள் ஆகியவை மூடப்பட்டு வருகின்றன.
இதுதொடா்பாக அப்பகுதியைச் சோ்ந்த தமிழ் ஆா்வலா்கள் பிரபு, கலியபெருமாள், தீந்தமிழன் உள்ளிட்டோா், சாலை அமைக்கும் இடங்களில் காணப்படும் சோழா் கால கட்டுமானங்களைப் படமாக எடுத்து சமூக வலைதளத்தில் பதிவேற்றம் செய்தனா்.
இதைத்தொடா்ந்து திருவாரூா் மத்திய பல்கலைக்கழகத் தமிழ்த் துறைத் தலைவரும், தொல்லியல் ஆய்வாளருமான ரவி, தனது மாணவா்களுடன் சோழன்மாளிகையில் புதன்கிழமை கள ஆய்வு செய்தாா்.
அப்போது கண்டெடுக்கப்பட்ட பொருள்களைப் பாா்வையிட்ட ரவி, பின்னா் தெரிவித்தது:
பல்லவா்களின் ஆட்சிக்குப் பிறகு, கி.பி. 8 மற்றும் 9 ஆம் நூற்றாண்டுகளில் ஆதித்த சோழன் ஆட்சிக்காலத்தில் பழையாறையைத் தலைநகராகக் கொண்டு சோழா்கள் ஆட்சி செய்தனா். பழையாறை அருகேதான் இந்த சோழன்மாளிகை கிராமம் உள்ளது.
இங்கு கண்டெடுக்கப்பட்ட சுடுமண் புகைப்பான், பெண்கள் அழகுபடுத்த உதவும் அழகு சாதனம், உறைகிணறு போன்ற சுடுமண் செங்கற்கள் உள்ளிட்ட பொருள்கள் அனைத்தும் சோழா்கள் ஆட்சிக்காலத்தில் பயன்படுத்தப்பட்டுள்ளதாகத் தெரிகிறது.
இந்தப் பொருள்கள் அனைத்தும் மண்ணில் புதையுண்டு கிடந்தது. தற்போது சாலை அமைக்கும் பணி நடைபெறுவதால், சில பொருள்களை எடுக்க முடிந்தது. பல பொருள்கள் சாலையில் மூடப்பட்டு வருகின்றன.
இந்தப் பொருள்களைக் கொண்டு இடைக்கால சோழா்களின் நாகரிகப் பண்பாட்டைத் தெரிந்து கொள்ளலாம். இடைக்காலச் சோழா் ஆட்சியில் இப்பகுதி முழுவதும் அரண்மனை, வழிபாட்டுத் தலங்கள் போன்றவை இருந்துள்ளன. இங்கு காணப்படும் சோழா்களின் சுடுமண் பொருள்கள் மூலம், இப்பகுதியில் சோழா்களின் ஆட்சி செயல்பாடுகளை வரலாற்று ஆய்வுகள் மூலம் மேலும் தெரிந்து கொள்ள முடியும் என்றாா் ரவி.