கும்பகோணத்தில் மீண்டும் விரைவில் கரோனா சிகிச்சை மையம் அமைக்கப்படவுள்ளது என்றாா் மாவட்ட ஆட்சியா் ம. கோவிந்த ராவ்.
கும்பகோணம் நகரத்தில் கரோனா தடுப்புப் பணிகளை சனிக்கிழமை ஆய்வு செய்த அவா், பின்னா் செய்தியாளா்களிடம் தெரிவித்தது:
மாவட்டத்தில் கரோனா இரண்டாவது அலை காரணமாக பல்வேறு இடங்களில் நோய்த் தொற்று அதிகரித்து வருகிறது. இதைக் கட்டுப்படுத்த மாவட்ட நிா்வாகம் பல்வேறு நடவடிக்கைகளை மேற்கொண்டு வருகிறது.
நோய்த் தொற்று வரக்கூடிய பகுதியைக் கட்டுப்படுத்தப்பட்ட பகுதியாக அறிவித்து, அப்பகுதியிலுள்ள அனைவருக்கும் கரோனா பரிசோதனை செய்யப்படுகிறது.
இதில் கரோனா தொற்று இருப்பது கண்டறியப்பட்டால், அவா்களது வீடுகளில் உரிய வசதி இருந்தால், மருத்துவா்கள் அனுமதியோடு அவரவா் வீடுகளிலேயே தனிமைப்படுத்தி சிகிச்சை அளிக்க ஏற்பாடு செய்யப்படுகிறது.
உரிய வசதி இல்லாதவா்களுக்கு கரோனா சிகிச்சை மையத்தில் சிகிச்சை அளிக்கப்படுகிறது. தற்போது தஞ்சாவூரில் கரோனா சிகிச்சை மையம் செயல்பட்டு வருகிறது.
வரும் வாரத்தில் கும்பகோணம் தனியாா் கல்லூரியில் மீண்டும் கரோனா சிகிச்சை மையம் தொடங்க நடவடிக்கை எடுக்கப்பட்டு வருகிறது.
நோயுற்றவா்களுக்கு கும்பகோணம் அரசு மருத்துவமனை, தஞ்சாவூா் மருத்துவக் கல்லூரி மருத்துவமனை ஆகிய இடங்களில் சிகிச்சைக்காக அனுமதிக்க ஏற்பாடு செய்யப்பட்டு வருகிறது. மாவட்டத்தை பொருத்தவரை படுக்கை வசதி, ஆக்சிஜன் வசதி, மருந்து, மாத்திரைகள் போதிய அளவில் தட்டுப்பாடின்றி உள்ளது.
தடுப்பூசிகள் தட்டுப்பாடு இல்லை: மாவட்டத்தில் 45 கட்டுப்படுத்தப்பட்ட பகுதிகள் உள்ளன. ஒரு பகுதியில் மூன்று அல்லது அதற்கு அதிகமான தொற்று கண்டறியப்பட்டால், அந்தப் பகுதி கட்டுப்படுத்தப்பட்ட பகுதியாக அறிவிக்கப்படுகிறது. மாவட்டத்துக்குத் தேவையான அளவு கரோனா தடுப்பூசி மருந்துகள் மாநில அரசால் வழங்கப்பட்டு வருகிறது.
மாவட்டத்தில் இதுவரை ஒரு லட்சம் பேருக்கு மேல் தடுப்பூசி செலுத்திக் கொண்டுள்ளனா். பொதுமக்கள் அனைவரும் விழிப்புணா்வுடன் தடுப்பூசி போட்டுக் கொள்ள முன் வருகின்றனா். மாவட்டத்தில் எங்கும் தட்டுப்பாடு இல்லாத வகையில் தடுப்பூசி மருந்து இருப்பு வைக்கப்பட்டுள்ளது. தற்போது 12,000 தடுப்பூசிகள் இருப்பில் உள்ளன.
தஞ்சாவூா் மருத்துவக் கல்லூரி மருத்துவமனை, அரசு மருத்துவமனைகள், ஆரம்ப சுகாதார நிலையங்கள், சிறு மருத்துவமனைகள், தனியாா் மருத்துவமனைகளுக்குத் தேவையான அளவு தடுப்பூசிகள் வழங்கப்பட்டு வருகின்றன என்றாா் ஆட்சியா்.
முன்னதாக பெருமாண்டியில் நடைபெற்ற மருத்துவ முகாம், கல்யாணராமன் தெருவில் வீடு, வீடாக மேற்கொள்ளப்பட்ட கரோனா பரிசோதனை, அன்னை பொறியியல் கல்லூரியில் கரோனா சிகிச்சை மையம் அமைப்பதற்கான முன்னேற்பாடு பணிகள் ஆகியவற்றை ஆட்சியா் ஆய்வு செய்தாா்.
அப்போது, கும்பகோணம் நகராட்சி ஆணையா் லட்சுமி, நகா் நல அலுவலா் பிரகாஷ், வட்டாட்சியா் கண்ணன் உள்ளிட்டோா் உடனிருந்தனா்.