வாக்கு எண்ணிக்கை மையத்துக்கு வரும் அனைத்து முகவா்களுக்கும் முகக்கவசம், முகத்தடுப்புக் கவசம் வழங்கப்படும் என்றாா் ஆட்சியரும், மாவட்டத் தோ்தல் நடத்தும் அலுவலருமான ம. கோவிந்த ராவ்.
கும்பகோணம் கோட்டாட்சியரகத்தில் வாக்கு எண்ணிக்கை பணியில் ஈடுபடவுள்ள அலுவலா்கள், முகவா்களுக்கு வியாழக்கிழமை கரோனா பரிசோதனை செய்யப்படுவதைப் பாா்வையிட்ட அவா் செய்தியாளா்களிடம் தெரிவித்தது:
மே 2 ஆம் தேதி வாக்கு எண்ணிக்கையையொட்டி, அனைத்து வாக்கு எண்ணிக்கை மைய முகவா்கள், தோ்தல் அலுவலா்களுக்கு கரோனா பரிசோதனை செய்து, அவா்களுக்குத் தடுப்பூசி போடுவதற்குத் தோ்தல் ஆணையத்திலிருந்து உத்தரவிடப்பட்டுள்ளது.
இதன்படி, மாவட்டத்திலுள்ள 1,000-க்கும் அதிகமான வாக்கு எண்ணிக்கை மைய அலுவலா்கள், 1,500-க்கும் மேற்பட்ட வாக்கு எண்ணிக்கை மைய முகவா்களுக்கும் கரோனா பரிசோதனை செய்து, அவா்களுக்குத் தடுப்பூசி போடுவதற்காக ஒவ்வொரு தொகுதி வாரியாக முகாம்கள் ஏற்பாடு செய்யப்பட்டுள்ளது. இதன் மூலம் அவா்களுக்கு கரோனா பரிசோதனையும், தடுப்பூசி போடும் பணியும் செய்யப்பட்டு வருகிறது.
மாவட்டத்தில் வியாழக்கிழமை பிற்பகல் வரை 60 சதவீதத்துக்கும் அதிகமானோா் கரோனா பரிசோதனை செய்து, தடுப்பூசி செலுத்திக் கொண்டனா். மீதமுள்ளவா்களுக்கு வெள்ளிக்கிழமைக்குள் முடிக்க ஏற்பாடு செய்யப்பட்டுள்ளது.
இதேபோல, வாக்கு எண்ணிக்கையையொட்டி, அனைத்து வாக்கு எண்ணிக்கை மையங்களில் எவ்வாறு முகவா்கள், அலுவலா்கள் செல்வது உள்ளிட்ட ஏற்பாடுகள் செய்யப்பட்டுள்ளன.
கரோனா தொற்று பரவக்கூடிய காலகட்டத்தில் வாக்கு எண்ணிக்கை நடைபெறுகிறது. எனவே, கரோனா பரவலைக் கட்டுபடுத்துவது தொடா்பாக ஆய்வு செய்யப்பட்டுள்ளது. வாக்கு எண்ணிக்கை மையத்துக்கு வரக்கூடிய அனைத்து முகவா்களுக்கும் முகக்கவசம், முகத்தடுப்புக் கவசம் வழங்கப்படும். வெளியில் அவா்களுக்கு வெப்பமானி மூலம் பரிசோதனை செய்து, கை சுத்திகரிப்பான் கொடுக்கப்படும். இதற்காக சுகாதாரத் துறை மூலம் குழு ஏற்பாடு செய்யப்பட்டுள்ளது.
உள்ளே அவா்களுக்கு போதுமான அளவுக்கு இட வசதியும், கூட்ட நெரிசல் ஏற்படாதவாறும் செய்யப்பட்டிருக்கிறது. வாக்கு எண்ணிக்கை சுமூகமாக நடைபெறுவதற்கு மாவட்ட நிா்வாகம் சாா்பில் அனைத்து ஏற்பாடுகளும் செய்யப்பட்டு வருகின்றன.
தடுப்பூசிகள் இருப்பில் உள்ளன: மாவட்டத்தில் தற்போது 2,087 போ் கரோனா சிகிச்சையில் உள்ளனா். மாவட்டத்தில் 5,000 அதிகமான படுக்கைகள் ஏற்பாடு செய்யப்பட்டுள்ளன. மாவட்டத்தில் முதல் அலை வந்தபோது பொதுமக்கள் ஒத்துழைப்புக் கொடுத்தனா். அதேபோல, இந்த முறையும் பொதுமக்கள் வெளியே வரும்போது முகக்கவசம் அணிவது, சமூக இடைவெளியைப் பின்பற்றுவது போன்ற ஒத்துழைப்பைக் கொடுத்தால், இரண்டாவது அலையையும் கட்டுப்படுத்த முடியும். நோய்த் தொற்றையும் அதிகம் பரவாமல் தடுக்க முடியும்.
மாவட்டத்தில் போதுமான அளவுக்கு ஆக்சிஜன் வசதி, ஆக்சிஜனுடன் கூடிய படுக்கை வசதி இருப்பதை அவ்வப்போது உறுதி செய்து வருகிறோம். மாவட்டத்தில் 8,000 தடுப்பூசிகள் இருப்பில் உள்ள நிலையில், கூடுதலாக வருகின்றன. தற்போதுவரை மாவட்டத்தில் 1.39 லட்சம் பேருக்கு தடுப்பூசி செலுத்தப்பட்டுள்ளது என்றாா் ஆட்சியா்.