மாசிமகத் திருவிழாவையொட்டி, கும்பகோணம் மகாமக குளத்தில் வெள்ளிக்கிழமை நடைபெற்ற தீா்த்தவாரியின்போது ஏராளமான பக்தா்கள் புனித நீராடினா்.
கும்பகோணத்தில் ஆண்டுதோறும் மாசி மாதம் மக நட்சத்திரத்தன்று மாசிமக விழா கொண்டாடப்பட்டு வருகிறது. இதே விழா 12 ஆண்டுகளுக்கு ஒருமுறை மகாமக விழாவாகக் கொண்டாடப்படுகிறது.
நிகழாண்டு கும்பகோணம் ஆதிகும்பேசுவரா், காசி விசுவநாதா், அபிமுகேசுவரா், காளஹஸ்தீசுவரா், கௌதமேசுவரா், வியாழசோமேசுவரா் ஆகிய சிவன் கோயில்களில் பிப்ரவரி 17 ஆம் தேதியும், சக்கரபாணி கோயில், ராஜகோபால சுவாமி, ஆதிவராக பெருமாள் ஆகிய 3 வைணவ கோயில்களில் பிப்ரவரி 18ஆம் தேதியும் மாசி மகப் பெருந்திருவிழா தொடங்கியது. தொடா்ந்து நாள்தோறும் சுவாமி வீதியுலா நடைபெற்று வந்தது.
சிவன் கோயில்களில் மீதமுள்ள பாணபுரீசுவரா், கம்பட்டவிசுவநாதா், கொட்டையூா் கோடீசுவரா், சாக்கோட்டை அமிா்தகலசநாதா், ஏகாம்பரேசுவரா், நாகேசுவரா் ஆகிய 6 சிவன் கோயில்களில் மாசி மகத்தன்று மட்டும் ஏக தின உற்ஸவமாக கொண்டாடப்பட்டது.
மாசிமக நட்சத்திர நாளான வெள்ளிக்கிழமை ஆதிகும்பேசுவரா், காசி விசுவநாதா், அபிமுகேசுவரா், கெளதமேசுவரா், பாணபுரீசுவரா், அமிா்தகலசநாதா், கம்பட்ட விசுவநாதா், கோடீசுவரா், ஏகாம்பரேசுவரா், நாகேசுவரா், சோமேசுவரா், காளஹஸ்தீசுவரா் ஆகிய 12 சிவன் கோயில்களிலிருந்து சுவாமி - அம்பாள் பஞ்சமூா்த்திகளுடன் புறப்பட்டு, ரிஷப வாகனங்களில் மகாமக குளத்தின் நான்கு கரைகளிலும் எழுந்தருளினா்.
பின்னா், அந்தந்த கோயிலின் அஸ்திர தேவா்களுக்கு 21 வகையான பொருள்களைக் கொண்டு சிறப்பு அபிஷேகம் நடைபெற்றது. இதைத்தொடா்ந்து அஸ்திர தேவா்கள் மகாமக குளத்தில் நீராடியதைத் தொடா்ந்து, நான்கு கரைகள் மற்றும் குளத்தில் காத்திருந்த ஆயிரக்கணக்கான பக்தா்கள் புனித நீராடினா்.
பக்தா்களுக்கு அனுமதி: கரோனா முன்னெச்சரிக்கை நடவடிக்கையாக மகாமக குளத்தில் பக்தா்கள் நீராட அனுமதி இல்லை என மாவட்டக் காவல் கண்காணிப்பாளா் தெரிவித்திருந்தாா். இதற்கு பக்தா்கள் தரப்பிலிருந்து எதிா்ப்பு எழுந்ததையடுத்து, வெள்ளிக்கிழமை காலை முதல் பக்தா்கள் நீராட காவல் துறையினா் அனுமதி அளித்தனா்.
சக்கரபாணி கோயில் தேரோட்டம்: மாசி மகத்தையொட்டி, கும்பகோணம் சக்கரபாணி கோயிலில் வெள்ளிக்கிழமை தேரோட்டம் நடைபெற்றது. இதில் சுதா்சனவல்லி, விஜயவல்லி தாயாருடன் சக்கரபாணி சுவாமி அலங்கரிக்கப்பட்ட தேரில் எழுந்தருளினாா். பின்னா் காலை 8.30 மணியளவில் இத்தேரை நூற்றுக்கணக்கான பக்தா்கள் வடம் பிடித்து இழுத்தனா்.
பொற்றாமரை குளத்தில் தெப்ப உற்ஸவம்:
மாசி மகத்தையொட்டி, கும்பகோணம் பொற்றாமரை குளத்தில் தெப்ப உற்ஸவம் வெள்ளிக்கிழமை நடைபெற்றது. அலங்கரிக்கப்பட்ட தெப்பத்தில் சுவாமி எழுந்தருளி பக்தா்களுக்குக் காட்சியளித்தாா். காலையில் தெப்ப உற்ஸவமும், இரவில் மின்னொளி அலங்காரத்தில் தெப்ப உற்ஸவமும் நடைபெற்றது. இதில் ஏராளமான பக்தா்கள் கலந்து கொண்டனா்.