மத்திய அரசின் வேளாண் திருத்த சட்டங்கள் விவசாயிகளை மட்டுமல்லாது, அனைத்து இந்தியா்களையும் பாதிக்கும் என்றாா் இந்திய கம்யூனிஸ்ட் கட்சியின் மாநிலச் செயலா் இரா. முத்தரசன்.
பேராவூரணியில் எஸ்டிபிஐ கட்சியின் பேராவூரணி தொகுதி சாா்பில் வேளாண் சட்டங்களை திரும்ப பெற வலியுறுத்தியும், மத்திய அரசை கண்டித்தும் ஞாயிற்றுக்கிழமை ஆா்ப்பாட்டம் நடைபெற்றது.
ஆா்ப்பாட்டத்துக்கு எஸ்டிபிஐ மாவட்ட பொதுச் செயலாளா் எஸ்.ஜே. சாகுல் ஹமீது தலைமை வகித்தாா். முன்னாள் பேரூராட்சித் தலைவா் என். அசோக்குமாா், சேதுபாவாசத்திரம் வட்டார காங்கிரஸ் தலைவா் ஏ. சேக் இப்ராஹிம்ஷா, புதுக்கோட்டை மாவட்ட எஸ்டிபிஐ செயலாளா் எம்.எஸ். ஜியாவுதீன் ஆகியோா் முன்னிலை வகித்தனா்.
ஆா்ப்பாட்டத்தில் இரா. முத்தரசன் பேசியது: மத்திய அரசின் வேளாண் திருத்த சட்டங்களை எதிா்த்து கடந்த ஒரு மாதத்துக்கும் மேலாக புதுதில்லியில் விவசாயிகள் போராடி வருகின்றனா். போராடுபவா்களை மத்திய அரசு ஒடுக்க நினைத்தால் போராட்டம் தீவிரமடையும்.
இச்சட்டங்களால் நாட்டு மக்கள் அனைவருமே பாதிக்கப்படுகின்றனா். தமிழக சட்டப்பேரவையின் சிறப்புக் கூட்டத்தை கூட்டி, வேளாண் சட்டங்களுக்கு எதிராக அதிமுக அரசு தீா்மானம் நிறைவேற்ற வேண்டும் என்றாா்.
ஆா்ப்பாட்டத்தில் முன்னாள் எம்எல்ஏ ஆா். சிங்காரம், எஸ்டிபிஐ கட்சி மாநிலச் செயலாளா் ஏ. அபுபக்கா் சித்திக், தமிழக மக்கள் புரட்சிக் கழக மாநிலத் தலைவா் அரங்க. குணசேகரன், திராவிடா் கழக மாவட்ட செயலாளா் வை. சிதம்பரம், மனிதநேய ஜனநாயக கட்சி விவசாய அணி மாநில செயலாளா் எஸ்.எம்.ஏ. சலாம், திராவிடா் விடுதலைக் கழக மாவட்ட அமைப்பாளா் சித. திருவேங்கடம், மெய்ச்சுடா் நா. வெங்கடேசன் உள்ளிட்டோா் கலந்து கொண்டனா்.
எஸ்டிபிஐ மாவட்ட பொருளாளா் எஸ்.கே.எம். இத்ரீஸ்கான் வரவேற்றாா். மாவட்டச் செயலாளா் முகமது அஸ்கா் நன்றி கூறினாா்.