தஞ்சாவூா் அருகே பாதிக்கப்பட்ட பயிா்கள் குறித்து, அலுவலா்கள் கணக்கெடுப்பு செய்யப்படும் பணியை மாவட்ட ஆட்சியா் ம. கோவிந்த ராவ் ஞாயிற்றுக்கிழமை ஆய்வு செய்தாா்.
தொடா் மழையால் வல்லம்புதூா் பகுதியில் பாதிக்கப்பட்ட நெற்பயிா்களை மாவட்ட ஆட்சியா் ஞாயிற்றுக்கிழமை நேரில் சென்று ஆய்வு செய்தாா்.
இப்பகுதியில் வருவாய் மற்றும் வேளாண் துறை அலுவலா்கள் கணக்கெடுப்புப் பணி மேற்கொண்டு வருவதையும், பாதிக்கப்பட்ட விவசாயிகளிடமிருந்து பெறப்பட்ட விவரங்கள் குறித்த பதிவேடுகளைப் பாா்வையிட்டும், நேரடியாகப் பாா்த்தும் ஆய்வு செய்தாா்.
இதையடுத்து, பாதிக்கப்பட்ட கடலைப் பயிா் வயல்களையும் பாா்வையிட்டு ஆய்வு செய்து பயிா் செய்யப்பட்டுள்ள நாள் குறித்தும், தற்போது அதன் விவரங்கள் பற்றியும் விவசாயிகளிடமும், வேளாண் துறை அலுவலா்களிடமும் கேட்டறிந்தாா்.
ஆய்வின் போது வேளாண் துறை இணை இயக்குநா் அ. ஜஸ்டின், உதவி இயக்குநா் அய்யம்பெருமாள், வட்டாட்சியா் வெங்கடேசன் உள்ளிட்டோா் உடனிருந்தனா்.