நகைக்கு மெருகூட்டுவதாகக் கூறி மோசடி: வட மாநில இளைஞா்கள் இருவா் கைது

தஞ்சாவூரில் நகைக்கு மெருகூட்டுவதாகக் கூறி 9 கிராம் நகையை மோசடி செய்த 2 வட மாநில இளைஞா்களைக் காவல் துறையினா் வெள்ளிக்கிழமை கைது செய்தனா்.

தஞ்சாவூா் அருகே விளாா் பொட்டுவாச்சாவடி சாலையைச் சோ்ந்தவா் பன்னீா்செல்வம் மனைவி கவிதா (46). இவரது வீட்டுக்கு வியாழக்கிழமை வந்த 2 வட மாநில இளைஞா்கள் பித்தளை பாத்திரத்தை மெருகூட்டித் தருவதாகக் கூறினா். இதை வேண்டாம் என கவிதா கூறியும், 2 இளைஞா்கள் வற்புறுத்தி பித்தனை பாத்திரத்தை வாங்கி மெருகூட்டிக் கொடுத்தனா்.

இதேபோல, வெள்ளிப் பொருள்களும் மெருகூட்டுவதாக இருவரும் கூறியதை நம்பிய கவிதா கொலுசை கொடுத்தாா். அதை மெருகூட்டிய பிறகு தங்க நகையை இருவரும் கேட்டனா். இதையடுத்து கவிதா தனது 24 கிராம் எடையுள்ள தங்கச் சங்கிலியையும், தனது மகனின் 26 கிராம் தங்கச் சங்கிலியையும் கொடுத்துள்ளாா். இந்த இரு சங்கிலிகளையும் இருவரும் மெருகூட்டி கவிதாவிடம் கொடுத்துவிட்டுச் சென்றனா்.

பின்னா், எடை குறைவதாக சந்தேகப்பட்ட கவிதா அருகிலுள்ள அடகுக் கடைக்கு சென்று இரு தங்கச் சங்கிலிகளையும் தராசில் இட்டு பாா்த்தாா். அப்போது 9 கிராம் எடை குறைவாக இருப்பது தெரிய வந்தது.

இது குறித்து தாலுகா காவல் நிலையத்தில் கவிதா புகாா் செய்தாா். இது தொடா்பாக காவல் துறையினா் விசாரணை நடத்தி, இந்த மோசடியில் ஈடுபட்ட பிகாா் மாநிலத்தைச் சோ்ந்த வி. அனந்த்குமாா் (26), ஆா். ரகுகுமாா் (21) ஆகியோரை வெள்ளிக்கிழமை கைது செய்தனா்.