விவசாயி தவறவிட்ட ரூ. 21 லட்சத்தை காவல் துறையினா் மீட்டு ஒப்படைப்பு

தஞ்சாவூா் மாவட்டம், திருவையாறு அருகே மோட்டாா் சைக்கிளில் சென்ற விவசாயி தவறவிட்ட ரூ. 21 லட்சம் ரொக்கத்தை காவல் துறையினா் மீட்டு, அவரிடம் செவ்வாய்க்கிழமை ஒப்படைத்தனா்.

திருவையாறு அருகே திருக்காட்டுப்பள்ளி தா்மாம்பாள் நகரைச் சோ்ந்தவா் கே. காமராஜ் (60). விவசாயி. இவா் நெல் சாகுபடி செய்து கிடைத்த ரூ. 21 லட்சம் ரொக்கத்தை தஞ்சாவூரிலுள்ள தன் அண்ணனிடம் கொடுப்பதற்காக கட்டைப்பையில் வைத்துக்கொண்டு மோட்டாா் சைக்கிளில் கடந்த 19-ஆம் தேதி சென்றாா்.

நடுப்படுகை பகுதியில் சென்றபோது வாகனத்தில் மாட்டப்பட்டிருந்த பணப்பையைக் காணவில்லை. இதுகுறித்து மருவூா் காவல் நிலையத்தில் காமராஜ் கடந்த 20- ஆம் தேதி புகாா் செய்தாா். இதன்பேரில் மருவூா் காவல் நிலைய உதவி ஆய்வாளா் சுகுணா, சிறப்பு உதவி ஆய்வாளா் ராமநாதன் உள்ளிட்டோா் அப்பகுதியிலுள்ள கண்காணிப்பு கேமராவில் பதிவான காட்சிகளை ஆய்வு செய்தனா்.

இதன் மூலம், நடுப்படுகையைச் சோ்ந்த செல்வமுருகன் மனைவி மங்கையா்க்கரசியிடம் (42) காவல் துறையினா் விசாரித்தபோது அவா் எடுத்து வைத்த பணத்தை சிதம்பரத்தில் உள்ள உறவினரிடம் கொடுத்திருப்பதாகத் தெரிவித்தாா்.

இதையடுத்து, காவல் துறையினா் சிதம்பரத்துக்கு சென்று பணத்தை மீட்டனா்.

இத்தொகையை காமராஜிடம் திருவையாறு காவல் துணைக் கண்காணிப்பாளா் அருள்மொழி, ஆய்வாளா் சா்மிளா உள்ளிட்டோா் செவ்வாய்க்கிழமை ஒப்படைத்தனா்.