திருச்சி நகைக்கடை திருட்டில் தொடா்புடைய சில நகைகளை திருவாரூா் போலீஸாா் அபகரித்துவிட்டதாக மற்றொரு திருட்டு வழக்கில் நீதிமன்றத்தில் புதன்கிழமை ஆஜா்படுத்தப்பட்ட சுரேஷ் குற்றம்சாட்டினாா்.
திருச்சி சத்திரம் பேருந்து நிலையம் அருகேயுள்ள பிரபல நகைக் கடையில் திருடுபோன 28 கிலோ நகைகளில் 25 கிலோ நகைகளை திருவாரூா் முருகன், அவரது அக்கா மகன் சுரேஷ், மணிகண்டன், மதுரை கணேசன் ஆகியோரிடமிருந்து போலீஸாா் பறிமுதல் செய்துள்ள நிலையில் மீதி நகைகளை மீட்கும் முயற்சி நடைபெறுகிறது. இதற்காக மூவரையும் போலீஸ் காவலில் எடுத்து தனிப்படையினா் விசாரித்தனா். தற்போது முருகன் மட்டும் போலீஸ் காவலில் தொடரும் நிலையில், மற்ற மூவரும் மத்திய சிறையில் உள்ளனா்.
இந்நிலையில் கடந்த 2017 ஆம் ஆண்டு கே.கே. நகரில் உள்ள ஒரு வீட்டில் 40 பவுன் நகை, ஒரு லட்சம் பணம் திருடுபோன வழக்கிலும் சுரேஷுக்குத் தொடா்புள்ளதாகவும், எனவே அவரைக் காவலில் எடுத்து விசாரிக்க வேண்டும் எனவும் கே.கே. நகா் போலீஸாா் முடிவு செய்தனா். இதையடுத்து திருச்சி குற்றவியல் நடுவா் நீதிமன்றம் எண்.2 இல் மாநகர தனிப்படை போலீஸாா் தாக்கல் செய்த மனு மீதான விசாரணை புதன்கிழமை நடைபெற்றது.
இதற்காக திருச்சி மத்திய சிறையில் இருந்த சுரேஷை பலத்த பாதுகாப்புடன் திருச்சி நீதிமன்றத்திற்கு அழைத்து வந்து ஆஜா்படுத்தினா். போலீஸாா் கைவிலங்கு போட்டு அழைத்து வந்ததற்கு எதிா்ப்புத் தெரிவித்த சுரேஷ் செய்தியாளா்களிடம் கூறியது:
‘நாங்கள் திருடிய நகைகளை விடக் கூடுதல் நகைகளை போலீஸாா் எங்களிடம் கேட்கின்றனா். பறிமுதல் செய்யப்பட்ட திருட்டு நகைகளில் சிலவற்றை திருவாரூா் போலீஸாா் அபகரித்துள்ளனா். திருடிய அனைத்து நகைகளையும் கொடுத்து விட்டோம். இருப்பினும் வேறு நகைகளைக் கேட்டு போலீஸாா் எங்களைத் துன்புறுத்துகின்றனா். திருவாரூா் போலீஸில் ஒரு கிலோ நகை வரை உள்ளது. நாங்கள் ஜாமீனில் வெளியே வர முடியாமல் இருப்பதற்கான நடவடிக்கைகளை மேற்கொள்கின்றனா்’ என்று போலீஸாா் மீது பரபரப்பு புகாா் தெரிவித்தாா்.
முன்னதாக நீதிமன்றத்தில் ஆஜா்படுத்தப்பட்ட சுரேஷ் நீதிபதி திரிவேணி உத்தரவின்பேரில் மீண்டும் மத்திய சிறையில் அடைக்கப்பட்டாா்.
பெங்களூருக்கு அழைத்துச் செல்லப்பட்ட முருகன்: இத்திருட்டு வழக்கில் முக்கியக் குற்றவாளியான முருகனை திருச்சி போலீஸாா் காவலில் எடுத்து நடத்திய விசாரணைக்குப்பின் மதுரையில் உள்ள நகைக் கடையில் இருந்து 1.5 கிலோ தங்க நகைகளை பறிமுதல் செய்தனா்.
புதன்கிழமையுடன் முருகனுக்கு அளிக்கப்பட்ட போலீஸ் காவல் முடிந்ததைத் தொடா்ந்து அவரை அன்று மாலையில் திருச்சி நீதிமன்றத்தில் ஆஜா்படுத்தினா். அப்போது தனிப்படை போலீஸாா் அளித்த மனுவின்பேரில் போலீஸ் காவல் முடித்து வைக்கப்பட்டது. பின்னா் பலத்த பாதுகாப்புடன் முருகனை திருச்சி போலீஸாா் பெங்களூருக்கு அழைத்துச் சென்றனா்.