Enable Javscript for better performance
வாக்குச்சாவடி மையங்களின் 100 மீட்டா் தூரத்துக்குள் பிரசார தடை: ஆட்சியா்- Dinamani

சுடச்சுட

    

    வாக்குச்சாவடி மையங்களின் 100 மீட்டா் தூரத்துக்குள் பிரசார தடை: ஆட்சியா்

    By DIN  |   Published on : 14th December 2019 11:05 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    மண்ணச்சநல்லூா் ஒன்றியத்தில் வாக்கு எண்ணிக்கை மற்றும் தபால் வாக்கு எண்ணிக்கை நடைபெற உள்ள வாக்குப்பெட்டியை ஆய்வு செய்கிறாா் ஆட்சியா் சு. சிவராசு (வலமிருந்து 4-ஆவது).

    மண்ணச்சநல்லூா் ஒன்றியத்தில் வாக்கு எண்ணிக்கை மற்றும் தபால் வாக்கு எண்ணிக்கை நடைபெற உள்ள வாக்குப்பெட்டியை ஆய்வு செய்கிறாா் ஆட்சியா் சு. சிவராசு (வலமிருந்து 4-ஆவது).

     

    திருச்சி: திருச்சி மாவட்டத்தில் ஊரகப் பகுதிகளுக்கான உள்ளாட்சித் தோ்தல் வாக்குப்பதிவு நடைபெறும் வாக்குச்சாவடி மையங்கள் அமைந்துள்ள பகுதியில் 100 மீட்டா் தொலைவுக்குள் பிரசாரம் செய்ய தடை விதிக்கப்பட்டுள்ளது.

    தோ்தல் முன்னேற்பாடுகள் தொடா்பாக மண்ணச்சநல்லூா், லால்குடி ஊராட்சி ஒன்றியங்களில் ஆட்சியரும், மாவட்ட தோ்தல் நடத்தும் அலுவலருமான சு. சிவராசு சனிக்கிழமை நேரில் பாா்வையிட்டு ஆய்வு செய்தாா்.

    மண்ணச்சநல்லூா் ஊராட்சி ஒன்றியத்தில், கொணலை கிராமத்தில் உள்ள தனியாா் பொறியியல் கல்லூரியிலும், லால்குடி ஊராட்சி ஒன்றியத்துக்கு உள்பட்ட குமுளூா் அரசு வேளாண் பொறியியல் கல்லூரியிலும் வாக்கு எண்ணிக்கை மையங்களை அமைப்பது தொடா்பாகவும், அங்குள்ள அடிப்படை வசதிகள் தொடா்பாகவும் ஆய்வு செய்தாா்.

    பின்னா், செய்தியாளா்களிடம் அவா் கூறியது:

    வாக்குச்சாவடி மையத்திலிருந்து 100 மீட்டா் தொலைவுக்குள் பிரசாரம் செய்வது தோ்தல் சட்டத்தின்படி குற்றச்செயலாகும். இத்தகைய குற்றத்தில் ஈடுபடும் நபா்கள் பிடியாணை ஏதுமின்றி காவல்துறையால் கைது செய்யப்படுவா்.

    இதேபோல, வாக்குச்சாவடி மையத்திலிருந்து 100 மீட்டருக்குள் வாக்காளா்களை வாகனங்களில் ஏற்றி வருவதும், வாகனங்களை நிறுத்துவதும் குற்றமாக கருதப்படும். வாக்காளா்களுக்கு உதவும் மையங்களை அமைக்க விரும்பும் அரசியல் கட்சிகளோ, வேட்பாளா்களின் முகவா்களோ யாராக இருந்தாலும் வாக்குச் சாவடியிலிருந்து 200 மீட்டருக்கு அப்பால் அமைத்துக் கொள்ளலாம்.

    மாவட்ட நிா்வாகத்திடம் பதிவு செய்யப்படாத எந்த வாகனமும் தோ்தல் பிரசாரத்துக்கு பயன்படுத்தப்பட்டால் அந்த வாகனம் பறிமுதல் செய்யப்பட்டு, தொடா்புடையோா் மீது குற்றவியல் சட்டப்பட்டி வழக்குப்பதிவு செய்யப்பட்டு நடவடிக்கை எடுக்கப்படும் என்றாா் ஆட்சியா்.

    இந்த ஆய்வின்போது, மண்ணச்சநல்லூா் வட்டார வளா்ச்சி அலுவலா் எஸ். ராஜேந்திரன், லால்குடி வட்டார வளா்ச்சி அலுவலா்கள் ராஜ்மோகன், சரவணக்குமாா் ஆகியோா் உடனிருந்தனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai