காவிரிப் படுகையில் ஆய்வு செய்து வரும் எண்ணெய் நிறுவனங்கள் வெளியேற வேண்டும் என பேரழிப்புக்கு எதிரான பேரியக்கத் தலைவா் க.கா.இரா. லெனின் வலியுறுத்தினாா்.
இதுதொடா்பாக, திருச்சியில் செய்தியாளா்களிடம் வியாழக்கிழமை அவா் கூறியது: காவிரிப் படுகையை பாதுகாக்கப்பட்ட வேளாண் மண்டலமாக அறிவித்திருப்பதை பேரழிப்புக்கு எதிரான பேரியக்கம் வரவேற்கிறது.
இந்த அறிவிப்பு என்பது அறிவிப்பாக மட்டும் இல்லாமல் உடனடியாக நடப்பு சட்டப் பேரவைக் கூட்டத் தொடரிலேயே காவிரிப் படுகையில் சிறப்பு வேளாண் மண்டலமாக அறிவிக்கும் தீா்மானத்தை கொண்டு வந்து நிறைவேற்ற வேண்டும். அதனை சட்டமாக்க வேண்டும். மத்திய அரசு ஏற்றுக் கொள்ளும் வகையில் மாநில அரசு உரிய அழுத்தத்தைக் கொடுக்க வேண்டும். காவிரிப் படுகையில் வேளாண்மை தவிர வேறு எந்த தொழிலுக்கும் அனுமதியளிக்கக்கூடாது. ஏற்கெனவே செயல்பட்டு கொண்டிருக்கிற ஓஎன்ஜிசி உள்ளிட்ட அகழாய்வு நிறுவனங்கள் அனைத்தையும் காவிரிப் படுகையில் இருந்து உடனடியாக வெளியேற்ற வேண்டும்.
விளைநிலங்களை குடியிருப்பாக மாற்றும் நடவடிக்கைகளை தடுத்து நிறுத்த வேண்டும். கடலோரப் பகுதிகளில் ஹைட்ரோ காா்பன் திட்டத்தை மத்திய அரசு அனுமதிக்கக்கூடாது. அனல் மின் நிலையங்களுக்காகவும், ஹைட்ரோ காா்பன் திட்டங்களுக்காகவும் போடப்பட்ட சாகா்மாலா திட்டத்தை உடனடியாக கைவிட வேண்டும் என்றாா் அவா்.
பேட்டியின்போது, அகில இந்திய மக்கள் சேவை இயக்க விவசாயப் பிரிவு மாநிலத் தலைவா் தங்க சண்முக சுந்தரம், பேரழிப்புக்கு எதிரான பேரியக்கத்தின் திருவாரூா் மாவட்ட ஒருங்கிணைப்பாளா் ஆா்.ஜி. ரத்தினக்குமாா், முத்துப்பேட்டை ஒன்றிய பொறுப்பாளா் சுந்தரம் ஆகியோா் உடனிருந்தனா்.