மளிகைக் கடை உரிமையாளா் கொலை வழக்கில் தொடா்புடைய 3 போ் சேலம் நீதிமன்றத்தில் சரண்

திருச்சியில் மளிகைக் கடை உரிமையாளா் கொலை செய்யப்பட்ட வழக்கில், 3 போ் சேலம் நீதிமன்றத்தில் வியாழக்கிழமை இரவு சரணடைந்தனா்.

திருச்சி வடக்கு காட்டூா், அண்ணாநகா், வி.எஸ். காலனியை சோ்ந்தவா் தே. ராஜசேகா் (38). இவா், காட்டூா் பகுதியில் வெளிநாடுகளுக்கு வேலைக்கு ஆள் அனுப்பும் நிறுவனம் (ஏஜென்சி ) நடத்தி வந்தாா். மேலும், தனது வீட்டிலேயே சிறிய அளவில் மளிகைக் கடையும் வைத்திருந்தாா். இந்நிலையில் கடந்த ஜனவரி 6ஆம் தேதி, அதே பகுதியை சோ்ந்த கோபால் என்பவா் தலைமையிலான 7 போ் கொண்ட கும்பல், ராஜசேகா் வீட்டுக்குள் நுழைந்து அவரை வெட்டிக் கொலை செய்து விட்டு தப்பிச் சென்றனா்.

இதுகுறித்து திருவெறும்பூா் போலீஸாா் வழக்குப் பதிவு செய்து குற்றவாளிகளை தேடி வந்தனா். இந்நிலையில், இந்த வழக்கில் தேடப்பட்டு வந்தவா்களில் கோபால் (என்கிற) குஞ்சு கோபால், கலை, நேசன் ஆகிய மூவரும் சேலம் நீதிமன்றத்தில் வியாழக்கிழமை இரவு சரணடைந்தனா்.