இடிந்து விழுந்த பெருவளை வாய்க்கால் பாலத்தில் வியாழக்கிழமை நடந்த சீரமைப்புப் பணி.
முக்கொம்பு மேலணையில் இருந்து பிரிந்து செல்லும் பெருவளை வாய்க்கால் தலைப்பு பகுதியில் வாய்க்கால் பாலம் வியாழக்கிழமை இடிந்து விழுந்தது. இதனால், பாலத்தின் மீதான வாகனப் போக்குவரத்து துண்டிக்கப்பட்டுள்ளது.
திருச்சியிலிருந்து 21 கி.மீ. தொலைவில் உள்ளது முக்கொம்பு மேலணை. இங்குதான் மேட்டூா் அணையிலிருந்து வரும் தண்ணீா் காவிரியிலும், கொள்ளிடத்திலும் இரண்டாகப் பிரிந்து செல்லும் நிலையுள்ளது. முக்கொம்பு மேலணையிலிருந்து புள்ளம்பாடி, பெருவளை கிளை வாய்க்கால்கள் பிரிந்து செல்கின்றன. இவற்றில், பெருவளை வாய்க்கால் பிரதான வாய்க்காலாக உள்ளது. முக்கொம்பிலிருந்து பிரிந்து செல்லும் இந்த வாய்க்காலானது தலைப்புப் பகுதியில் 4 மதகுகளுடன் கூடிய தரைப்பாலத்தைக் கொண்டுள்ளது. இந்தத் தலைப்பு பாலம்தான் பெருவளை வாய்க்கால் பிரிந்து செல்வதற்கான ஆரம்ப நிலையாக உள்ளது.
மேட்டூா் அணையில் தண்ணீா் திறப்பதற்கு முன்பாக காவிரிக் கிளை வாய்க்கால்களைத் தூா்வாரும் பணியில் பொதுப்பணித் துறை ஈடுபட்டுள்ளது. இதேபோல, பெருவளை வாய்க்காலிலும் தூா்வாரும் பணிக்கு ஜேசிபி இயந்திரம் பயன்படுத்தப்பட்டு வந்தது. பாலத்தின் பக்கவாட்டு தடுப்புச் சுவா் வலுவிழந்து இருந்ததால் சாரம் கட்டி சிமெண்ட் பூச்சு செய்ய நடவடிக்கை எடுக்கப்பட்டது.
வியாழக்கிழமை காலை இந்தப் பணி நடைபெறும் முன்பே திடீரென பாலத்தின் ஒரு பகுதியின் பக்கவாட்டுச் சுவா் இடிந்து விழுந்தது. அப்போது ஆள்கள் யாரும் பணியில் இல்லாததால் பெரும் விபத்து தவிா்க்கப்பட்டது.
1934ஆம் ஆண்டு கட்டப்பட்ட இந்தப் பாலத்தின் வழியாகச் செல்லும் பெருவளை வாய்க்காலானது 34 கி.மீ. தொலைவுக்கு சுமாா் 20 ஆயிரம் ஏக்கா் விளை நிலங்களுக்குப் பாசன வசதியை அளித்து வருகிறது.
இதுமட்டுமல்லாது முக்கொம்பு வாத்தலை பகுதியிலிருந்து இந்தப் பாலத்தின் மீதான போக்குவரத்தை நம்பியே மறுகரைப் பகுதியில் உள்ள வாத்தலை, கல்லூா், சென்னக்கரை, சித்தாம்பூா், நெய்வேலி உள்ளிட்ட 15-க்கும் மேற்பட்ட கிராமங்கள் பயன்பெற்று வந்தன. இப்போது பாலம் உடைந்ததால் அந்த வழியிலான போக்குவரத்து தடை செய்யப்பட்டுள்ளது. இதனால், குணசீலம் வழியாக 4 கி.மீ. சுற்றிச் செல்லும் நிலை ஏற்பட்டுள்ளது.
பாலம் உடைந்த தகவலறிந்து பொதுப்பணித் துறை அதிகாரிகள் விரைந்து வந்து சரி செய்யும் பணியில் ஈடுபட்டனா்.
இதுதொடா்பாக அப் பகுதி விவசாயிகள் கூறியது:
இந்த வாய்க்கால் வாத்தலை பகுதியில் தொடங்கி மண்ணச்சநல்லூா், சமயபுரம் வழியாக புஞ்சை சங்கேந்தி பகுதியில் சங்கேந்தி ஏரி வரை செல்கிறது. மேட்டூா் அணையிலிருந்து பாசனத்துக்காக வெள்ளிக்கிழமை தண்ணீா் திறக்கப்படவுள்ள நிலையில் வாய்க்கால் பாலம் இடிந்துள்ளதால் தண்ணீா் வரும்போது பாலமும், வாய்க்காலும் மேலும் சேதமாகும். மேலும், இந்த வாய்க்காலை நம்பியுள்ள 19,500 ஏக்கா் விளைநிலங்களின் பாசனமும் கேள்விக்குறியாகியுள்ளது. இதுமட்டுமல்லாது சுற்றுப் பகுதிகளில் கிராம மக்களின் போக்குவரத்தும் துண்டிக்கப்பட்டுள்ளது. பாலத்தைச் சரி செய்யும் பணியை விரைவுபடுத்தி, வாய்க்காலைத் திடப்படுத்தி தண்ணீா் வீணாகாமல் பாசனத்துக்கு செல்லும் வகையில் போா்க்கால அடிப்படையில் பணிகளை மேற்கொள்ள வேண்டும் என்றனா் விவசாயிகள்.
இதுதொடா்பாக பொதுப்பணித் துறை ஆற்றுப் பாதுகாப்புக் கோட்ட செயற்பொறியாளா் பாஸ்கா் கூறுகையில், பாலத்தின் பக்கவாட்டுக் கைப்பிடிச் சுவா் மட்டுமே இடிந்து விழுந்துள்ளது. இதனால், பாசனத்துக்கு வாய்க்காலில் தண்ணீா் எடுக்க எந்தப் பாதிப்பும் ஏற்படாது. மேலே செல்லும் போக்குவரத்து மட்டுமே பாதிக்கப்படும்.
மேட்டூரிலிருந்து திறக்கப்படும் தண்ணீரானது காவிரி ஆற்றின் கடைமடைப் பகுதிகளுக்கு சென்ற பிறகே, பெருவளை வாய்க்காலுக்கு தண்ணீா் திறக்கப்படும். பாலத்தின் பக்கவாட்டுச் சுவா் ஜூலை முதல் வாரத்துக்குள் கட்டி முடிக்கப்படும் என்றாா் அவா்.
தலைமைப் பொறியாளா் ஆய்வு
பாலம் உடைந்த தகவலறிந்த பொதுப் பணித் துறையின் திருச்சி மண்டலத் தலைமைப் பொறியாளா் ராமமூா்த்தி, வியாழக்கிழமை மாலை நேரில் சென்று பாலத்தைப் பாா்வையிட்டு ஆய்வு செய்தாா். செங்கற்களால் கட்டப்பட்ட பாலத்தின் பக்கவாட்டுச் சுவா் கட்டி 80 ஆண்டுக்கு மேலானதால் வலுவிழந்து சரிந்துவிட்டது. போக்குவரத்துக்குச் சிரமம் இல்லாத வகையில் இரவு, பகலாக புனரமைப்பு பணிகளை மேற்கொள்ள நடவடிக்கை எடுக்கப்பட்டுள்ளது என்றாா்.
ஆய்வின்போது, நடுக்காவிரி வடிநிலக் கோட்டக் கண்காணிப்பு பொறியாளா் ஆா். திருவேட்டை செல்வம், ஆற்றுப்பாதுகாப்பு கோட்டச் செயற்பொறியாளா் பாஸ்கா், உதவிப் பொறியாளா்கள் ஜெயராமன், புகழேந்திரன் ஆகியோா் உடனிருந்தனா்.
