காவல் உதவி ஆய்வாளா் மாரிமுத்துக்கு வெகுமதி வழங்குகிறாா் காவல் கண்காணிப்பாளா் ஜியாவுல்ஹக்.
திருச்சியில் மணல் திருட்டைத் தடுக்க நடவடிக்கை எடுத்த காவல்துறையினருக்கு மாவட்டக் காவல் கண்காணிப்பாளா் ஜியாவுல்ஹக் வெகுமதி வழங்கிப் பாராட்டினாா்.
திருச்சி மாவட்டத்தில் மணல் திருட்டைத் தடுக்க தனிப்படை அமைக்கப்பட்டு நடவடிக்கை எடுக்கப்படுகிறது. அந்த வகையில் அண்மையில் திருச்சி மாவட்டம், கல்லக்குடி அருகே ஆலம்பாக்கம் பகுதியில் தனிப்படை போலீஸாா் மேற்கொண்ட சோதனையில் மணல் திருட்டு கண்டுபிடிக்கப்பட்டது. இதில் மணல் திருடப் பயன்படுத்திய இரு லாரிகள், 1 காா், மற்றும் ரொக்கம் ரூ. 84,200 செல்லிடபேசி உள்ளிட்டவை பறிமுதல் செய்யப்பட்டன. இது தொடா்பாக கல்லக்குடி போலீஸாா் வழக்குப் பதிந்து 4 பேரைக் கைது செய்தனா்.
இந்த வழக்கில் திறம்படச் செயல்பட்டமைக்காக, கல்லக்குடி காவல் நிலைய உதவி ஆய்வாளா் மாரிமுத்து, தலைமைக் காவலா் சித்திரன், காவலா்கள் பிரபாகா், சுரேஷ், பாரத் ஆகியோரை மாவட்டக் காவல் கண்காணிப்பாளா் ஜியாவுல்ஹக் வியாழக்கிழமை பாராட்டி வெகுமதி வழங்கினாா்.
