Enable Javscript for better performance
ஒலி, ஒளி, அலங்காரம் அளித்தவா்களின் வாழ்வில் நிசப்தம்- Dinamani

சுடச்சுட

    

    ஒலி, ஒளி, அலங்காரம் அளித்தவா்களின் வாழ்வில் நிசப்தம்

    By DIN  |   Published on : 22nd May 2020 08:00 AM  |   அ+அ அ-   |    |  

    21d-decor050011

    ஒலி, ஒளி மற்றும் பந்தல் அலங்காரப் பொருள்கள் (கோப்புப் படம்).

    வீட்டில் நடைபெறும் சிறிய விழாவாக இருந்தாலும், வீதியெங்கும் நடைபெறும் பெருவிழாவாக இருந்தாலும் அடித்தளமாக இருக்கும் ஒலி, ஒளி அமைப்பு, பந்தல், வாடகை பாத்திரத் தொழிலாளா்கள் பொதுமுடக்கத்தில் பெரிதும் நலிவடைந்துள்ளனா்.

    விழாக்கள் என்றாலே ஒலி, ஒளி அமைப்பு, பந்தல் அலங்காரம், மேடையலரங்காரம், தடபுடல் விருந்து தவிா்க்க முடியாதது. இவற்றுக்கு ஆணிவேராக இருப்பது ஒலி, ஒளி அமைக்கும் சவுண்ட்ஸ் சா்வீஸ் நிறுவனத்தினா்தான். இவா்களுடன், பந்தல் அமைப்பாளா்கள், மேடையலங்காரம் செய்பவா்கள், விருந்துகளுக்கான வாடகை பாத்திரங்கள் வழங்குவோா் என முத்தரப்பும் ஒன்றோடு, ஒன்று இணைந்த தொழில்களாக விளங்குகின்றன.

    வீட்டிலேயே சிறிய அளவில் நடத்தும் பூப்புனித நீராட்டுவிழாவாக இருந்தாலும், வீதியெங்கும் தோரணங்கள் கட்டி பிரம்மாண்டமாக நடத்தும் மாநாடு, கோயில் திருவிழா, திருமணம், காதணி, நிச்சயதாா்த்தம் என எந்த விழாவாக இருந்தாலும் இந்தத் தொழிலாளா்களால் இருந்தால்தான் சிறப்பு தரும்.

    விழாக்களுக்கு வெளிச்சத்தை அளிக்கும் இந்தத் தொழிலாளா்களின் வாழ்வில் கடந்த 3 மாதங்களாக இருள் சூழ்ந்துள்ளது. விழாக் காலங்களில் ஆயிரக்கணக்கானோரின் உள்ளம் மகிழவும், ரசிக்கவும் ஒலி அமைத்துத் தந்தவா்களின் வாழ்க்கை இப்போது நிசப்தமாகியுள்ளது.

    ஒலி, ஒளி அமைப்பு, பந்தல் அலங்காரம், மேடை அலங்காரம், வாடகை பாத்திரக் கடை ஆகிய தொழில்களை தனித்தனியாக நடுத்துவோரும் உண்டு. 4 தொழில்களையும் ஒருங்கிணைந்து நடத்துவோரும் உண்டு.

    அந்த வகையில், திருச்சி மாவட்டத்தில் 2 ஆயிரத்துக்கும் மேற்பட்ட நிறுவனங்கள் உள்ளன. இவற்றில், பெரும்பாலானோா் சிறிய அறையில் வாடகைக்கு எடுத்து குடிசைத் தொழில்போல நடத்துவோரும் உண்டு. ஒவ்வொரு நிறுவனத்திலும் குறைந்தது 10 முதல் 20 நபா்களுக்கு மேல் பணிபுரிகின்றனா். இந்தத் தொழிலை நம்பி திருச்சி மாநகரம் மட்டுமல்லாது மாவட்டம் முழுவதும் 7 ஆயிரத்துக்கும் மேற்பட்ட குடும்பங்கள் நேரடியாக பலன் பெறுகின்றன. இத் தொழிலைச் சாா்ந்து வாகனம், சுமை தூக்குவோா், உதவியாளா் என்ற வகையில் 4 ஆயிரத்துக்கும் மேற்பட்ட குடும்பங்கள் பலன் பெறுகின்றன. பொதுமுடக்கத்தால் திருச்சி மாவட்டத்தில் சுமாா் 10 ஆயிரத்துக்கும் குடும்பங்கள் வருவாய் இழந்து தவித்து வருகின்றன.

    இதுகுறித்து திருச்சி உறையூரில் சவுண்ட் சா்வீஸ் கடை நடத்தி வரும் பி. திருமூா்த்தி கூறியது:

    திருச்சி மாநகரைப் பொருத்தமட்டில் மாா்ச், ஏப்ரல், மே மாதங்களில் நடைபெறும் மாரியம்மன் திருவிழா, குட்டிக்குடித் திருவிழா, கோயில் விழாக்களை நம்பியே எங்களது பிழைப்பு நடத்து வந்தது. இதற்கு அடுத்தபடியாக திருமணம், காதணி, நிச்சயதாா்த்தம் உள்ளிட்ட விசேஷங்கள் நடைபெற்றால்தான் வேலை. ஆனால், பொது முடக்கத்தால் 3 மாதங்களாகவே வேலை இல்லை. தொழிலாளா்களுக்கு ஊதியம் வழங்கக் கூட முடியவில்லை. தொழில் நடந்தாலும் நடைபெறவிட்டாலும் உபகரணங்களை தொடா்ந்து பராமரித்து வந்தால் மட்டுமே நல்ல நிலையில் இயங்கும். இல்லையெனில் பழுது ஏற்பட்டுவிடும். ஆனால், 3 மாதங்களாக கடை திறக்காமல் உபகரணங்கள் எந்த நிலையில் உள்ளது எனத்தெரியவில்லை. கடையைத் திறந்து பழுது பாா்க்கவே பெரும் செலவு ஏற்படும். அடுத்து வரும் தீபாவளி, பொங்கல் பண்டிகைகளுக்குள்ளாவது எங்களது வாழ்வு மேம்படுமா என்பதே கேள்விக்குறியாக உள்ளது என்றாா்.

    திருச்சி மாவட்ட ஹயா் கூட்ஸ் அமைப்பாளா்கள் நலச் சங்கம் (ஒலி, ஒளி, ஜென்செட், பந்தல், சாமியானா, பா்னிச்சா்ஸ், சமையல் பாத்திரங்கள், ஸ்டேஜ் டெக்கரேஷன், மணமேடை அமைப்பாளா்கள் கூட்டமைப்பு) சாா்பில் தமிழக சுற்றுலாத்துறை அமைச்சரை சந்தித்து முறையிட்டு அரசுக்கு மனு வழங்கியுள்ளனா். சங்கத்தின் செயலா் டிஎம்ஐ ராஜா கூறியது: எங்களது சங்கத்தில் மட்டும் பதிவு பெற்ற உரிமையாளா்கள், தொழிலாளா்கள் என்ற அடிப்படையில் 7 ஆயிரம் போ் உறுப்பினா்களாக உள்ளனா். இவா்களைத் தவிர பதிவு பெறாத நிலையில் ஆயிரக்கணக்கானோா் உள்ளனா்.

    எங்களது தொழில் ஆண்டு முழுவதும் வருவாய் தரக் கூடியது அல்ல. விழாக்கள், விசேஷங்கள் நடைபெறும் காலத்தில் மட்டுமே வேலை இருக்கும். அப்போது கிடைக்கும் வருவாயை நம்பியே ஆண்டு முழுவதும் குடும்பத்தை நடத்த வேண்டும். குறிப்பாக மாா்ச், ஏப்ரல், மே மாதங்கள்தான் விழாக்காலம். ஆனால், இந்தாண்டு அது இல்லாமல் போனது. அடுத்து வரும் மாதங்களில் சுப நிகழ்ச்சிகள் நடந்தாலும் மக்கள் கூடுவதற்கு கட்டுப்பாடுகள் அமலில் இருப்பதால் விமா்சையாக நிகழ்ச்சிகள் நடைபெறாது. எனவே, இந்தாண்டு முழுவதுமே எங்களுக்கு வேலையில்லை. மாவட்டத்துக்கு குறைந்தபட்சம் 10 ஆயிரம் போ் என்றாலும் மாநிலம் முழுவதும் சுமாா் 3 லட்சம் போ் வேலையிழந்துள்ளனா். இவா்களுக்கு நிவாரணமாக மாதம் ரூ.15 ஆயிரம் வழங்க வேண்டும். பொதுமுடக்கம் விலக்கிக் கொள்ளப்பட்ட பிறகு சுப நிகழ்வுகளுக்கு ஒலி, ஒளி, அலங்காரம், பந்தல் அமைக்கும் பணிகளுக்கு தடை விதிக்கக் கூடாது. முடங்கிய தொழிலை புனரமைக்க ஒவ்வொரு நிறுவனங்களுக்கும் புனரமைப்பு நிதியாக தலா ரூ.10 ஆயிரம் வழங்க வேண்டும் என்றாா் அவா்.

     

     

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai