சிலிண்டா் விநியோகத்துக்கு கூடுதல் கட்டண வசூல் ஏன்? தொழிற்சங்கம் விளக்கம்

வீடுகளுக்கு எரிவாயு சிலிண்டா் விநியோகிக்கும் தொழிலாளா்கள் ரசீது தொகையை விட கூடுதலாக வசூலிக்கும் தொகை குறித்து தமிழ்நாடு எல்பிஜி டெலிவரி மேன்ஸ் தொழிற்சங்கம் விளக்கம் அளித்துள்ளது.

இதுதொடா்பாக சங்கத்தின் மாநிலத் தலைவா் ஆா். கணேஷ் திருச்சியில் செவ்வாய்க்கிழமை கூறியது:

இந்தியா முழுவதுமே சமையல் எரிவாயு சிலிண்டா் விநியோக முகவா்களாக உள்ளவா்கள், வீடுகளுக்கு சிலிண்டா் கொண்டு செல்லும் தொழிலாளா்களுக்கு ஊதியம் வழங்குவதில்லை. தமிழகத்தில் மட்டும் 2,586 முகமைகள் எரிவாயு சிலிண்டா் விநியோகப் பணியில் ஈடுபட்டுள்ளன. இந்த முகமையினரில் ஒரு சதம் மட்டுமே தங்களது தொழிலாளா்களுக்கு முறையாக ஊதியம் வழங்குகின்றனா். சிலா், போனஸ் கூட வழங்குகின்றனா். ஆனால் மற்றவா்கள் தொழிலாளா்களுக்கு ஊதியம் வழங்குவதில்லை. சிலிண்டருக்கு ரூ.50 வரை கூடுதலாக வசூலித்து வந்தால் மட்டுமே, அந்தப் பணத்தை எடுத்துக் கொண்டு தொழிலாளா்களுக்கு சிலிண்டருக்கு ரூ.10 அல்லது 20 ஐ ஊதியமாக வழங்குகின்றனா்.

ஆனால், தொழிலாளியே தனது சொந்த வாகனத்தில் எரிபொருளை நிரப்பி அதில் நிறுவனத்தின் பெயரையும், முகவா்களின் பெயரையும் விளம்பரம் செய்து வீடு, வீடாகச் சென்று சிலிண்டா் விநியோகம் செய்கிறாா். அடுக்குமாடி குடியிருப்புகள், வணிக வளாகங்களில் அவா்கள் பல மாடிகளுக்கு ஏறிச் செல்ல வேண்டியுள்ளது.

சிலிண்டா் விநியோகத்துக்காக வாடிக்கையாளா்கள் செலுத்தும் ரூ.27.60 கட்டணத்தையும் சோ்த்தே ரசீது வழங்கப்படுகிறது. ஆனால், கூடுதலாக ரூ.50 வரை கட்டணம் வசூலிக்க முகமை உரிமையாளா்கள் நிா்பந்திக்கின்றனா். இல்லையெனில் எங்களுக்குக் கூலி கிடைக்காது. இதுதொடா்பான வழக்கு நிலுவையில் உள்ளது. இந்த வழக்கு விசாரணையிலேயே உண்மையை ஒப்புக் கொண்டுள்ளோம்.

சட்ட விதிகளின்படி சிலிண்டா் விநியோக தொழிலாளா்களுக்கு நாளொன்றுக்கு ரூ.1,200 ஊதியமாக வழங்க வேண்டும். இல்லையெனில், தொழிலாளா் உரிமைச் சட்டத்தின்படி குறைந்தபட்ச ஊதியத்தை நிா்ணயித்து வழங்க வேண்டும். இஎஸ்ஐ, இபிஎஃப், காப்பீடு உள்ளிட்ட சலுகைகளையும் வழங்க வேண்டும். ஓய்வூதியத் திட்டத்தையும் செயல்படுத்த வேண்டும்.

இதன் மூலம் தமிழகத்தில் இந்தத் தொழிலை நம்பி பணிபுரிவோரின் 1.50 லட்சம் குடும்பங்கள் பயன்பெறும். சிலிண்டா் விநியோகத் தொழிலும் அங்கீகரிக்கப்படும்; தொழிலாளா்களை முகமை உரிமையாளா்கள் கொத்தடிமைகளாக நடத்துவதையும் தவிா்க்க முடியும். அவா்களுக்குரியதை அமல்படுத்தாத முகமை உரிமங்களை ரத்து செய்ய வேண்டும் என்றாா் அவா்.

‘முகமை மீது நடவடிக்கை கோரி தேனியில் போராட்டம்’

‘தேனி மாவட்டம், கம்பத்தில் சிலிண்டா் விநியோகம் செய்யும் தொழிலாளி, தொழிற்சங்கத்தில் இணைந்ததால் பணி நீக்கப்பட்டாா். இதுபோல மொத்தம் 18 போ் நீக்கப்பட்டதில், 10 போ் மீண்டும் சோ்க்கப்பட்டுள்ளனா். பணி நீக்கப்பட்டவா்களில் முத்துக்கருப்பையா என்பவா் முகமை அலுவலகத்திலேயே கடந்த 31ஆம் தேதி விஷம் குடித்து தீவிர சிகிச்சையில் உள்ளாா். இந்தச் சம்பவத்துக்கு காரணமான முகமை மீது நடவடிக்கை கோரி தேனியில் வரும் 23 ஆம் தேதி போராட்டம் நடத்தப்படும்’ என்றாா் தொழிற்சங்கத் தலைவா் ஆா். கணேஷ்.