மணப்பாறை: திருச்சி மாவட்டம், மணப்பாறை அருகே மணவை குயின்ஸ் ரோட்டரி சங்கம் சாா்பில் ரூ. 1 லட்சம் மதிப்பில் புனரமைக்கப்பட்ட பொடங்குப்பட்டி ஊராட்சி ஒன்றிய துவக்கப்பள்ளி திறப்பு விழா வியாக்கிழமை நடைபெற்றது.
பொடங்குப்பட்டியில் பன்னாட்டு ரோட்டரி மாவட்டம் 3000-ன் கீழ் மணவை குயின்ஸ் ரோட்டரி சங்கம் சாா்பில் பொடங்குப்பட்டி ஊராட்சி ஒன்றிய தொடக்கப்பள்ளி வளாகத்தில் புனரமைக்கப்பட்ட மகிழ்ச்சி பள்ளி தொடக்க விழாவுக்கு மணவை குயின்ஸ் ரோட்டரி தலைவா் மருத்துவா் என். சோபனா ஆனந்த் தலைமை வகித்தாா்.
நிகழ்வு தலைவா் சுகந்தி போஸ்கோ, செயலா் லலிதா அழகப்பன் ஆகியோா் முன்னிலை வகித்தனா். பள்ளியானது மணவை குயின்ஸ் ரோட்டரி சாா்பில் பள்ளிக் கட்டடங்களுக்கு வண்ணம் தீட்டியும், ஓவிய வழி கற்றல் படங்கள் வரைந்தும், பசுமைத்தோட்டம், கை கழுவுமிடம், ஊஞ்சல் என சுமாா் ரூ.1 லட்சம் மதிப்பில் புனரமைக்கப்பட்டிருந்தது.
சிறப்பாளராகக் கலந்துகொண்ட மணப்பாறை கல்வி மாவட்ட தொடக்கக் கல்வி அலுவலா் ஜெகநாதன், வட்டாரக் கல்வி அலுவலா்கள் புளோரா ஆரோக்கியமேரி, கே. மருதநாயகம், மணப்பாறை ஒன்றியத் தலைவா் அமிா்தவள்ளி ராமசாமி, ஊராட்சித் தலைவா் கோகிலாதிருப்பதி ஆகியோா் வாழ்த்தினா். ஏற்பாடுகளை ஒருங்கிணைத்த பள்ளி தலைமையாசிரியா் ச. ஆரோக்கியசாமி நன்றி கூறினாா்.