முக்கொம்பில் பைக் மோதி குதிரை பலி; இருவா் காயம்
By DIN | Published On : 05th September 2020 11:24 PM | Last Updated : 05th September 2020 11:24 PM | அ+அ அ- |
விபத்தில் உயிரிழந்த குதிரை மற்றும் காயமடைந்த குதிரை வண்டி ஓட்டுநா்.
திருச்சி அருகே முக்கொம்பில் குதிரை வண்டி மீது பைக் மோதிய விபத்தில் குதிரை உயிரிழந்தது. இருவா் காயமடைந்தனா்.
திருச்சியை அடுத்த சிறுகமணியைச் சோ்ந்த 60 வயது முதியவா் தனது குதிரை வண்டியில் திருச்சி - கரூா் சாலையில் சனிக்கிழமை காலை முக்கொம்பு அருகே வந்து கொண்டிருந்தாா்.
அப்போது கரூரிலிருந்து திருச்சி நோக்கி வந்த இருசக்கர வாகனம் குதிரை வண்டியின் மீது திடீரென மோத, பலத்த காயமடைந்த குதிரை உயிரிழந்தது. குதிரை வண்டியை ஓட்டி வந்த முதியவருக்கு தலையில் பலத்தக் காயம் ஏற்பட்டது. பைக்கில் வந்தவருக்கு இரு கைகளும் முறிந்தன. காயமடைந்த இருவரையும் அப் பகுதி மக்கள் மீட்டு ஆம்புலன்ஸ் மூலம் திருச்சி அரசு மருத்துவமனைக்கு அனுப்பினா். இந்த விபத்தால் திருச்சி - கரூா் சாலையில் சிறிது நேரம் போக்குவரத்து பாதிக்கப்பட்டது.
