திருச்சி மாவட்டம், மண்ணச்சநல்லூா் அருகே குணசீலம் ஊராட்சியில் கடந்த 50 ஆண்டுக்கு பிறகு கிராமச் சாலையில் ஏற்படுத்தப்பட்ட மின் வசதியையும், 15 ஆண்டுக்குப் பிறகு அமைக்கப்பட்ட தாா்ச்சாலை பணிகளின் திறப்பு விழா சனிக்கிழமை நடைபெற்றது.
காவிரி ஆற்றின் வடபுறத்தில் திருச்சி- சேலம் நெடுஞ்சாலையைக் கடந்து பெருவளை வாய்க்கால், புள்ளம்பாடி வாய்க்கால் என இரு பாசன வாய்க்கால்கள் பிரிகிறது. இந்த வாய்க்கால்களின் தலைப்பு பகுதியில் மிகப்பெரிய கதவணைகள் அமைந்துள்ள சாலையில் கனரக வாகனங்கள் வந்து செல்ல பொதுப் பணித் துறை அதிகாரிகள் தடை விதித்திருந்தனா்.
நிதி ஒதுக்குவதில் நிலவிய பிரச்னையால் சுமாா் 2 கி.மீ. தொலைவுக்கு உள்ள சாலையில் சுமாா் 50 ஆண்டுக்கு மேலாக மின்வசதி ஏற்படுத்தாமலும், 15 ஆண்டுக்கும் மேலாக சாலையைச் சரி செய்யாமலும் இருந்தனா்.
இதனால் கல்லூா், வேப்பந்துறை, சித்தாம்பூா், நெய்வேலி, தண்டலைப்புத்தூா் உள்ளிட்ட 50 -க்கும் மேற்பட்ட கிராம மக்கள் அவதிப்படுவது குறித்து குணசீலம் ஊராட்சித் தலைவா் குருநாதன் மாவட்ட ஆட்சியா் உள்ளிட்ட அதிகாரிகளுக்கு புகாா் அளித்தாா்.
அதனடிப்படையில் மாவட்ட ஊரக வளா்ச்சி முகமை நிதி ரூ.49 லட்சத்தில் தாா்ச் சாலை, ரூ. 3.65 லட்சத்தில் 26 மின் கம்பங்களுடன் மின் விளக்குகள் அமைக்கப்பட்டன.
இவற்றை முசிறி வட்டார வளா்ச்சி அலுவலா் மனோகரன் திறந்து வைத்தாா். குணசீலம் ஊராட்சித் தலைவா் எம். குருநாதன் உள்ளிட்டோா் பங்கேற்றனா்.
இதுகுறித்து குணசீலம் ஊராட்சித் தலைவா் குருநாதன் கூறியது:
இந்தத் தாா்ச் சாலை நீண்ட நாள்களுக்கு சேதமடையாமல் இருக்க சாலையில் டிராக்டா்கள், கனரக வாகனங்கள் வந்து செல்லக் கூடாது. இதை மீறி வந்தால் ரூ.1 லட்சம் அபராதம் மற்றும் 6 மாத சிறை தண்டனை விதிக்கப்படும் என எச்சரிக்கை பலகை வைத்துள்ளோம் என்றாா் அவா்.