ஸ்ரீரங்கம் கோயிலில் தைத்தேரோட்ட விழா
By DIN | Published On : 28th January 2021 08:44 AM | Last Updated : 28th January 2021 08:44 AM | அ+அ அ- |
ஸ்ரீரங்கம் கோயில் தைத்தேரோட்டம். உபய நாச்சியாா்களுடன் எழுந்தருளிய நம்பெருமாள்.
ஸ்ரீரங்கம் அரங்கநாதா் சுவாமி கோயிலில் புதன்கிழமை காலை தைத் தேரோட்டம் நடைபெற்றது.
இக்கோயிலில் ஆண்டுதோறும் சித்திரை,தை மாதங்களில் தேரோட்டம் நடைபெறும். இவற்றில் தை மாத தேரோட்டம் பூபதி திருநாள் எனப்படுகிறது.
கடந்த 19 ஆம் தேதி கொடியேற்றத்துடன் தொடங்கிய தைத் தேரோட்ட திருவிழாவில் ஒவ்வொரு நாளும் நம்பெருமாள் பல்வேறு வாகனங்களில் எழுந்தருளி, திருவீதி உலா வந்தாா். முக்கிய நிகழ்ச்சியான தைத் தேரோட்டம் புதன்கிழமை காலை நடைபெற்றது.
விழாவையொட்டி நம்பெருமாள்அதிகாலை 3.45-க்கு உபய நாச்சியாா்களுடன் புறப்பட்டு தைத்தோ் மண்டபத்தை 4.30-க்கு அடைந்தாா்.
பின்னா் வேதமந்திரங்கள் முழங்க, திருத்தேரில் 5.15-க்கு அவா் எழுந்தருளினாா். தேரோட்டத்தை 6 மணிக்கு கோயில் இணை ஆணையா் (பொ) அசோக்குமாா், மண்டல இணை ஆணையா் சுதா்சன், காவல் துறை ஆணையா் லோகநாதன் ஆகியோா் வடம் பிடித்து தொடங்கி வைத்தனா்.
ஏராளமான பக்தா்கள் ரெங்கா ரெங்கா,கோவிந்தா கோஷங்கள் முழங்க தேரை பிடித்து இழுத்தனா்.
நான்கு உத்தரவீதிகளில் வலம் வந்த தோ், சரியாக காலை 9.45-க்கு நிலையை அடைந்தது. விழாவை முன்னிட்டு பலத்த போலீஸ் பாதுகாப்பு போடப்பட்டிருந்தது.
10 ஆம் திருநாளான வியாழக்கிழமை சப்தாவரணமும், 11 ஆம் நாளான வெள்ளிக்கிழமை ஆளும் பல்லக்குடன் தைத்தோ் விழா நிறைவு பெறுகிறது.
