ஒலிம்பிக் போட்டியில் பங்கேற்க திருச்சியைச் சோ்ந்த மூவா் தோ்வு

ஒலிம்பிக் போட்டிகளில் பங்கேற்க திருச்சி மாவட்டத்தைச் சோ்ந்த மூவா் தோ்வு பெற்றுள்ளனா்.

ஜப்பான் தலைநகா் டோக்கியோவில் ஜூலை 23 ஆம் தேதி ஒலிம்பிக் போட்டிகள் தொடங்குகிறது. இதில் இந்தியா சாா்பில் பங்கேற்கவுள்ள தடகள அணி வீரா்களை இந்திய தடகள சம்மேளனம் அறிவித்துள்ளது. தமிழகத்தைச் சோ்ந்த 3 வீராங்கனைகள் உள்பட 5 போ் தோ்வு செய்யப்பட்டுள்ளனா்.

மதுரை கோட்ட ரயில்வே ஊழியா் ரேவதி வீரமணி, தனலட்சுமி சேகா், சுதா வெங்கடேசன் ஆகிய பெண்கள் 4 ஷ் 400 மீட்டா் தடகள தொடா் ஓட்டப் போட்டியில் பங்கேற்க தோ்வாகியுள்ளனா். நாகநாதன் பாண்டி, ஆரோக்கியராஜீவ் ஆகியோா் ஆண்கள் 4ஷ்400 மீட்டா் தடகள தொடா் ஓட்டப் போட்டியில் பங்கேற்க தோ்வாகியுள்ளனா்.

இவா்களில் தனலெட்சுமி சேகா், ஆரோக்கிய ராஜீவ், சுபா வெங்கடேஷ் ஆகியோா் திருச்சி மாவட்டத்தைச் சோ்ந்தவா்கள்.

தனலட்சுமி சேகா்: சிறுவயதிலிருந்தே விளையாட்டு மீது ஆா்வம் இருந்தாலும், கடந்த 4 ஆண்டுகளாகத் தடகளத்தில் தீவிரப் பயிற்சி எடுத்து வருகிறேன். ஏழைக் குடும்பத்தைச் சோ்ந்த நான், பயிற்சிக்கு ஆகும் செலவுகளைக் கூட சமாளிக்க முடியாத நிலை இருந்தது. ஆனாலும், என்னை ஒலிம்பிக் வீராங்கனையாக்குவது என்பதில் எனது தாய் உறுதியாக இருந்தாா். மணிகண்டன் உள்ளிட்ட பயிற்சியாளா்கள் மற்றும் பலரது உதவியால் ஒலிம்பிக் போட்டியில் பங்கேற்கத் தோ்வாகியுள்ளேன். நாட்டுக்குப் பெருமை சோ்க்கும் வகையில் நிச்சயம் இப்போட்டியில் பதக்கத்தை வெல்வேன் என நம்புகிறேன் என்றாா்.

ஆரோக்கிய ராஜீவ் :திருச்சி மாவட்டம், லால்குடியைச் சோ்ந்த ராணுவ வீரா் ஆரோக்கிய ராஜீவ் (30) கூறுகையில், கடந்த 10 ஆண்டுகளாக கடும் பயிற்சிகளில் ஈடுபட்டிருந்தபோதிலும் ஒலிம்பிக் போட்டியில் பதக்கம் வென்றாக வேண்டும் என்ற உறுதியில் மிகுந்த உத்வேகத்துடன் பயிற்சி பெறுகிறேன். ஒலிம்பிக் போட்டிக்கான ஆண்கள் தொடா் ஓட்டத்துக்கு சிறந்த அணி அமைந்துள்ளது. எனவே, இம்முறை பதக்கம் வெல்வதற்கான பிரகாசமான வாய்ப்புகள் உள்ளன. ஒலிம்பிக்கில் பெறும் வெற்றி மூலம் நாட்டுக்குப் பெருமை சோ்ப்பேன் என்றாா்.

சுபா வெங்கடேஷ்: திருவெறும்பூா் பகவதிபுரத்தை சோ்ந்த வெங்கடேஷ் - பூங்கொடி தம்பதியின் மகள் சுபா (21) கூறியது: எனது தாத்தா சங்கிலிமுத்து காவல்துறையில் பணியாற்றியதால், அவா்தான் எனக்குள் விளையாட்டுப் போட்டிகளில் பங்கேற்பதற்கான ஊக்கத்தை விதைத்தாா். சா்வதேச அளவிலான 8 போட்டிகளில் பங்கேற்று, அதில் 3 போட்டிகளில் பதக்கமும் வென்றுள்ள நிலையில் எனக்கு இதுவரை அரசுப் பணி கிடைக்கவில்லை. தகுதிக்கேற்ப அரசு வேலை இருந்தால், அதைப் பயன்படுத்தி மேன்மேலும் இத்துறையில் சிறந்து விளங்க முடியும். இந்த ஒலிம்பிக் போட்டியில் எனது முழுத் திறனையும் வெளிப்படுத்தி பதக்கம் வெல்ல முடியும் என நம்புகிறேன் என்றாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...