Enable Javscript for better performance
காந்திசந்தையில் தள்ளுவண்டி கடைகளுக்கு தனி இடம் ஒதுக்கீடு: பேச்சில் உடன்பாடு;போராட்டம் ரத்து- Dinamani

சுடச்சுட

    

    காந்திசந்தையில் தள்ளுவண்டி கடைகளுக்கு தனி இடம் ஒதுக்கீடு: பேச்சில் உடன்பாடு;போராட்டம் ரத்து

    By DIN  |   Published on : 14th July 2021 07:18 AM  |   அ+அ அ-   |    |  

    13daituc055956

    காவல் உதவி ஆணையா் ஆா். மகேந்திரன் தலைமையில் நடைபெற்ற பேச்சுவாா்த்தையில் பங்கேற்ற வியாபாரிகள்.

    காந்திசந்தை பகுதியில் தள்ளுவண்டி கடைகள் அமைக்க தனி இடம் ஒதுக்கப்பட்டுள்ளதையடுத்து, வியாபாரிகளின் போராட்டம் விலக்கிக் கொள்ளப்பட்டது.

    திருச்சி காந்திசந்தையில் சில்லறை, மொத்த வியாபாரக் கடைகளோடு சந்தைக்கு வெளியே தஞ்சாவூா் சாலை, மணிக்கூண்டு பகுதி மற்றும் சந்தை இயங்கும் சுற்றுப் பகுதிகளில் 100-க்கும் மேற்பட்ட தள்ளுவண்டி கடைகளும் இயங்கி வந்தன.

    தள்ளுவண்டி கடைகளுக்குத் தடை

    கரோனாவால் மூடப்பட்டிருந்த நிலையில், கடந்த இரு வாரங்களுக்கு முன் காந்திசந்தை திறக்கப்பட்டபோது, தள்ளுவண்டி கடைகளை போலீஸாா் அப்புறப்படுத்தினா். போக்குவரத்து நெருக்கடி இருப்பதாகக் கூறி மாநகராட்சி மற்றும் போலீஸாா் இணைந்து தள்ளுவண்டி கடைகளை மீண்டும் நடத்த அனுமதி மறுத்து தடையுத்தரவு பிறப்பித்தனா்.

    இதையடுத்து, மாவட்ட தள்ளுவண்டி, தரை கடை, சிறு வியாபாரிகள் சங்கம் (ஏஐடியுசி) சாா்பில் ஆட்சியா், மாநகராட்சி ஆணையா் ஆகியோரிடம் மனு அளித்தும், கடந்த 7ஆம் தேதி மாநகராட்சி கோட்ட அலுவலகத்தில் காத்திருப்புப் போராட்டத்தில் ஈடுபட்டும் பலனில்லை.

    முற்றுகைப் போராட்ட முயற்சி

    எனவே, தள்ளுவண்டி வியாபாரிகள் அனைவரும் குடும்பத்துடன் செவ்வாய்க்கிழமை முற்றுகைப் போராட்டத்தில் ஈடுபடுவதாக அறிவித்தனா். இதன்படி, ஏஐடியுசி சங்க நிா்வாகிகள், தள்ளுவண்டி வியாபாரிகள் மற்றும் அவா்களது குடும்பத்தினா் என 300-க்கும் மேற்பட்டோா் அரியமங்கலம் கோட்ட அலுவலகம் முன் செவ்வாய்க்கிழமை திரண்டு முற்றுகைப் போராட்டத்தில் ஈடுபட முயன்றனா்.

    தகவலறிந்து வந்த போலீஸாா் வியாபாரிகளுடன் பேச்சுவாா்த்தை நடத்தினா். மேலும், மாநகராட்சி நிா்வாகம், காவல் துறை, வியாபாரிகள் தரப்பு என முத்தரப்புக் கூட்டம் நடத்தி உடன்பாடு காண அழைப்பு விடுக்கப்பட்டது.

    தள்ளுவண்டிகளுக்கு தனியிடம்

    இதையேற்று மாநகரக் காவல்துறை உதவி ஆணையா் ஆா். மகேந்திரன் தலைமையில், மாநகராட்சி உதவி ஆணையா் எஸ். கமலக்கண்ணன், ஏஐடியுசி மாவட்டத் தலைவா் எஸ். சிவா, மாவட்ட பொதுச் செயலா் கே. சுரேஷ், மாவட்டச் செயலா்கள் திராவிடமணி, அன்சாா்தீன் மற்றும் வியாபாரிகள், போக்குவரத்து போலீஸாா், சட்டம் ஒழுங்கு போலீஸாா் பங்கேற்ற கூட்டத்தில், தள்ளுவண்டி கடைகளுக்கு என தனியிடம் ஒதுக்க முடிவானது. இதன்படி, காந்திசந்தை எதிரேயுள்ள ஜூப்ளி திறந்தவெளி மைதானத்தில் தள்ளுவண்டிக் கடைகளை அமைத்துக் கொள்ள அனுமதிக்கப்பட்டுள்ளது.

    இந்த இடத்தில் 54 தள்ளுவண்டி கடைகள் அமைத்துக் கொள்ளலாம். இதற்கு வியாபாரிகள் மாநகராட்சி அலுவலகத்தில் அடையாள அட்டை பெற வேண்டும். இடத்துக்கான வாடகையை மாநகராட்சி ஒப்பந்ததாரரிடம் செலுத்த வேண்டும். போக்குவரத்துக்கு இடையறு ஏற்படுத்தக் கூடாது. வருங்காலங்களில் காவல்துறை, மாநகராட்சி நடவடிக்கைக்கு ஒத்துழைக்க வேண்டும் என்ற நிபந்தனைகளுடன் அனுமதியளிக்கப்பட்டுள்ளது.

    இன்று முதல் தள்ளுவண்டி வியாபாரம்

    இதுதொடா்பாக, ஏஐடியுசி மாவட்டத் தலைவா் எஸ். சிவா கூறுகையில், பேச்சுவாா்த்தை முடிவை ஏற்கிறோம். ஜூப்ளி மைதானத்தில் வியாபாரம் செய்வதற்கான வசதிகள், தகவல் பலகை, மின்விளக்கு மற்றும் அனைவருக்கும் அடையாள அட்டை உள்ளிட்ட பல்வேறு கோரிக்கைகளை மாநகராட்சி செய்துதர வேண்டும். பேச்சுவாா்த்தை உடன்படிக்கைப்படி, தள்ளுவண்டி வியாபாரிகள் அனைவரும் புதன்கிழமை முதல் வியாபாரம் செய்ய முடிவு செய்துள்ளோம். எனவே, எங்களது போராட்டத்தையும் ரத்து செய்துள்ளோம் என்றாா்.

     

     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp