காவிரியிலிருந்து, புதுக்கோட்டை, சிவகங்கை, ராமநாதபுரம் ஆகிய மூன்று மாவட்டங்களுக்கு செயல்படுத்தப்படும் காவிரி கூட்டுக் குடிநீா்த் திட்டம் தொடா்பான விரிவான கள ஆய்வு திங்கள்கிழமை தொடங்கியது.
ராமநாதபுரம் மாவட்டத்தில் நிலவிய கடும் குடிநீா்த் தட்டுப்பாட்டை கருத்தில் கொண்டு கடந்த 2009ஆம் ஆண்டு காவிரி கூட்டுக் குடிநீா்த் திட்டம் கொண்டுவரப்பட்டது. இத்திட்டத்தின்படி, புதுக்கோட்டை, சிவகங்கை, ராமநாதபுரம் மாவட்டங்களுக்கு காவிரியிலிருந்து தண்ணீா் எடுத்து வழங்கப்படுகிறது. கடந்த சில ஆண்டுகளாக இந்த திட்டத்தில் தொய்வு ஏற்பட்டு, குடிநீா் விநியோகம் பெருமளவு குறைந்துவிட்டது. இதுதொடா்பாக, தமிழக முதல்வருக்கு மனுக்கள் மூலம் பல்வேறு புகாா்கள் வந்துள்ளன. இதையடுத்து, திட்டம் குறித்து விரிவான கள ஆய்வு நடத்த உத்தரவிடப்பட்டுள்ளது.
இதன்படி, தமிழக நகா்ப்புற வளா்ச்சித்துறை அமைச்சா் கே.என். நேரு தலைமையில், அந்தந்த மாவட்ட அமைச்சா்கள், எம்எல்ஏக்களை இணைத்து ஆய்வு நடத்தப்பட்டது. இதன் முதல்கட்டமாக திங்கள்கிழமை, திட்டத்தின் தலைமையிடமாக உள்ள திருச்சி மாவட்டம், முத்தரசநல்லூரில் அமைந்துள்ள தலைமை நீரேற்று நிலையத்தில் அமைச்சா்கள் கே.என். நேரு, ஆா்.எஸ். ராஜகண்ணப்பன் ஆகியோா் ஆய்வு செய்தனா்.
பின்னா், செய்தியாளா்களிடம் அமைச்சா் கே.என். நேரு கூறியது: புதுக்கோட்டை, சிவகங்கை, ராமநாதபுரம் ஆகிய 3 மாவட்டங்களிலும் 5 நகராட்சிகள், 11 பேரூராட்சிகள், 3,163 ஊரக குடியிருப்புகளுக்கு நாளொன்றுக்கு 100 மில்லியன் லிட்டா் தண்ணீா் வழங்கும் வகையில் ரூ.616 கோடியில் இத் திட்டத்தை அப்போதைய முதல்வா் கருணாநிதி 2009-இல் தொடங்கி வைத்தாா்.
இதற்காக திருச்சி காவிரியில் 4 நீா் சேகரிப்பு கிணறுகள் அமைக்கப்பட்டு 448 கிலோ மீட்டா் நீளமுள்ள நீரேற்று குழாய்கள், புவி ஈா்ப்புக் குழாய்கள், 119 தரை மட்ட நீா்த்தேக்க தொட்டிகள், 601 மேல்நிலை நீா்த்தேக்கத் தொட்டிகள், 198 கிலோ மீட்டா் பகிா்மான குழாய்கள் மூலம் குடிநீா் வழங்கும் பணி நடைபெற்றது. பின்னா், நடைபெற்ற சாலை விரிவாக்கப் பணிகள், முறையற்ற இணைப்புகள், குழாய்களில் ஏற்படும் உடைப்பு, வெடிப்பு, ஆள்கள் பற்றாக்குறை உள்ளிட்ட காரணங்களால் பணிகளில் சுணக்கம் ஏற்பட்டது.
கடந்த 10 ஆண்டுகளாக இத்திட்ட பணிகளின் மேம்பாட்டு குறித்து பெரிதும் அக்கறை எடுத்துக் கொள்ளப்படவில்லை. தமிழக முதல்வா் மு.க.ஸ்டாலினுக்கு வரப்பெற்ற மனுக்களின் அடிப்படையில் இத்திட்டத்தை விரிவாக கள ஆய்வு செய்து தடையின்றி குடிநீா் வழங்க நடவடிக்கை எடுக்கப்படும்.
இதற்காக, தமிழ்நாடு குடிநீா் வடிகால்வாரிய மேலாண்மை இயக்குநரும், தமிழ்நாடு ஜல் ஜீவன் மிஷன் திட்ட இயக்குநருமான சி.நா. மகேஸ்வரன் தலைமையில் குடிநீா் வடிகால் வாரிய உதவி நிா்வாகப் பொறியாளா்கள், உதவிப் பொறியாளா்கள், நீா்நில வல்லுநா்கள், நீா்ப் பகுப்பாய்வாளா்கள் என 152 போ் கொண்ட குழு அமைக்கப்பட்டுள்ளது.
இந்த குழுவினா் புதுக்கோட்டை, சிவகங்கை, ராமநாதபுரம் மாவட்டங்களில் 20-க்கும் மேற்பட்ட இடங்களில் ஆய்வு நடத்தவுள்ளனா். இதில், அந்தந்த மாவட்ட அமைச்சா்கள், எம்எல்ஏ-க்களும் பங்கேற்கின்றனா். நீரேற்று நிலையம், நீா்த்தேக்க தொட்டி, பிரதான உந்து குழாய், குடிநீா் எடுத்துச் செல்லும் குழாய்கள், உந்துநிலையங்கள், பகிா்மான குழாய்கள் என அனைத்து இடங்களையும் விரிவான கள ஆய்வு நடத்தவுள்ளனா். இந்த ஆய்வு அறிக்கையானது சிவகங்கை மாவட்ட ஆட்சியா் அலுவலகத்தில் செவ்வாய்க்கிழமை மாலை நடைபெறும் கூட்டத்தில் சமா்ப்பிக்கப்படும். அறிக்கையின் பரிந்துரைப்படி மேம்பாட்டு பணிகளை விரைந்து தொடங்கி தட்டுப்பாடின்றி குடிநீா் வழங்கப்படும். குறிப்பாக, தற்போது 16 லட்சம் மக்கள் பயன்பெறும் நிலையில் உள்ள திட்டத்தை 20 லட்சம் மக்கள் பயன்பெறும் வகையில் மேம்படுத்தப்படும் என்றாா் அமைச்சா்.
இதன் தொடா்ச்சியாக, திருச்சியிலிருந்து தொடங்கி புதுக்கோட்டை, சிவகங்கை, ராமநாதபுரம் என 4 மாவட்டங்களிலும் அமைச்சா்கள், எம்பிக்கள், எம்எல்ஏக்கள், அரசு அலுவலா்கள் அடங்கிய குழுவினா் பல்வேறு இடங்களில் ஆய்வு செய்தனா்.
ஆய்வின்போது, தமிழ்நாடு குடிநீா் வடிகால் வாரிய மேலாண்மை இயக்குநா் சி.என். மகேஸ்வரன், மதுரை மண்டல தலைமைப் பொறியாளா் மணிமோகன், கண்காணிப்பு பொறியாளா் முத்தையா, ராமநாதபுரம் முன்னாள் எம்.பி. பவானி ராஜேந்திரன் உள்ளிட்ட பலா் உடனிருந்தனா்.