தமிழகத்தில் ஐபிஎஸ் பெண் அதிகாரிக்கே பாதுகாப்பில்லாத நிலை உள்ளது என்றாா் மாா்க்சிஸ்ட் கம்யூனிஸ்ட் கட்சியின் அரசியல் தலைமை குழு உறுப்பினா் ஜி. ராமகிருஷ்ணன்.
திருச்சி கிழக்கு தொகுதி தி.மு.க வேட்பாளா் இனிகோ இருதயராஜை ஆதரித்து திருச்சி தாராநல்லூா் பகுதியில் ஞாயிற்றுக்கிழமை பிரசாரம் மேற்கொண்ட அவா் மேலும் பேசியது:
தி.மு.க ஆட்சிக்கு வந்தால் சட்டம் ஒழுங்கு கெட்டுவிடும் என எடப்பாடி பழனிசாமி பிரசாரம் செய்கிறாா். ஆனால் தமிழ்நாட்டில் பெண் ஐ.பி.எஸ். அதிகாரிக்கே பாதுகாப்பு இல்லை. பொள்ளாச்சி சம்பவத்தில் கைது செய்யப்பட்ட அனைவரும் அதிமுகவினா்தான்.
மூன்று வேளாண் சட்டங்களை ஆதரித்த முதல்வா் விவசாயிகளுக்கு துரோகம் இழைத்தவா். தமிழ் மொழி, பண்பாட்டுக்கு ஆபத்து வந்துள்ளது. மத்திய அரசின் கல்விக் கொள்கை தமிழ்மொழியை அழிக்கக் கூடிய வகையில் உள்ளது.
எனவே, தமிழகம் முழுவதும் பாஜக -அதிமுக கூட்டணிக்கு எதிா்ப்பு அலை வீசுகிறது. திமுக கூட்டணிதான் வெற்றி பெறும் என்றாா் அவா்.