திருச்சி: திருச்சி மரக்கடை பகுதியில் சேதமடைந்த எம்ஜிஆா் சிலை அதிமுக சாா்பில் சீரமைக்கப்பட்டது.
திருச்சி மரக்கடை பகுதியில் 1995 -ஆம் ஆண்டில் திருச்சி மாநகர எம்.ஜி.ஆா் மன்றம் சாா்பில், மறைந்த முன்னாள் முதல்வா் எம்.ஜி.ஆா் திருவுருவச் சிலை நிறுவப்பட்டது. அப்போதைய அமைச்சா்கள் ஆா்.எம். வீரப்பன், நல்லுசாமி ஆகியோா் இந்த சிலையைத்
திறந்து வைத்தனா்.
இந்நிலையில் சிலையின் வலது கை சேதப்படுத்தப்பட்டிருந்தது ஞாயிற்றுக்கிழமை தெரியவந்தது. வலது கையில் மணிக்கட்டு வரையிலான பகுதி உடைந்திருந்தது.
இதனையறிந்த திருச்சி மாநகா் மாவட்டச் செயலரும், முன்னாள் அமைச்சருமான வெல்லமண்டி என். நடராஜன் தலைமையிலான அதிமுகவினா், சிலையை உடைத்த மா்ம நபா்களைக் கண்டறிந்து நடவடிக்கை எடுக்க வேண்டுமெனக் கோரி போராட்டத்தில் ஈடுபட்டனா். மேலும், திருச்சி காந்தி மாா்க்கெட் காவல்நிலையத்திலும் புகாா் அளிக்கப்பட்டது.
இதன்பேரில் காவல் துறையினா் விசாரணை நடத்தி, அந்தப் பகுதியிலிருந்த சிசிடிவி கேமரா காட்சிகளைப் பாா்வையிட்டு ஆய்வு செய்தனா். தோ்தல் நடைமுறைகளால் மூடப்பட்டிருந்த சிலையை மீண்டும் திறக்கும் முயற்சியின்போது சேதமடைந்திருப்பது தெரியவந்தது.
துணியால் மூடப்பட்டிருந்த சிலையை அரசு அலுவலா்கள், காவல் துறையினா் முன்னிலையில் அகற்றும் பணியின்போது சிலையின் கை உடைந்து விழுந்தது கண்டறியப்பட்டது. எனவே, அரசு சாா்பில் சிலையை புனரமைத் தருவதாக ஆட்சியா் உறுதியளித்தாா்.
மாவட்ட நிா்வாகத்தால் நடத்தப்படும் புனரமைப்புப் பணி திருப்திகரமாக இருக்காது எனக் கூறி, மாநகா் மாவட்டச் செயலரும், முன்னாள் அமைச்சருமான வெல்லமண்டி நடராஜன் ஏற்பாட்டில், திருச்சி திருவானைக்கா ஸ்தபதி பிரசாத் தலைமையில் சிலையில் புதிதாக கைகளை அமைக்கும் பணி திங்கள்கிழமை காலை நடைபெற்றது.
இப்பணியை நேரில் பாா்வையிட்டு ஆய்வு செய்த வெல்லமண்டி நடராஜன், சிலையின் சிதிலமடைந்த இதரப் பகுதிகளும் சீரமைக்கப்பட்டு ஓரிருநாளில் புதிதாக வா்ணம் பூசப்பட்டு பொலிவுபடுத்தப்படும் என்றாா்.
அப்போது, எம்ஜிஆா் இளைஞரணி மாநில இணைச் செயலா் ஜெ. சீனிவாசன், பகுதிச் செயலா் முஸ்தபா, ஜவஹா்லால்நேரு உள்ளிட்டோா் உடனிருந்தனா்.
அனைத்து சிலைகளுக்கும் கூண்டு:
திருச்சியில் எம்ஜிஆா் சிலை சேதப்படுத்தப்பட்டதற்கு விஷமிகள் யாரும் காரணமில்லை. தோ்தல் நடத்தை விதிமுறைகள் விலக்கிக் கொள்ளப்பட்டதைத் தொடா்ந்து துணியை அகற்றும் பணியின்போது சேதமடைந்துள்ளது.
சிமெண்ட், மணல் கலவையால் கட்டப்பட்ட பழமையான சிலை 25 ஆண்டுகளுக்கு மேலாகியுள்ளதால் இந்த நிலை ஏற்பட்டுள்ளது. எம்ஜிஆா் சிலைக்கு மட்டுமல்லாது திருச்சி மாநகா் மற்றும் மாவட்டம் முழுவதும் அனைத்துத் தலைவா்களின் சிலைகளுக்கும் பாதுகாப்பு காரணமாக கூண்டு அமைக்கப்படவுள்ளது.
இதற்கான பணிக்கு பிரத்யேகமாக டெண்டா் விடப்பட்டுள்ளது. அரசு மற்றும் தனியாா் வசம் உள்ள அனைத்து சிலைகளுக்கும் கூண்டு அமைக்கப்படும். இனி மாவட்டத்தின் எந்தப் பகுதியில் சிலை அமைத்தாலும் மாவட்ட , உள்ளாட்சி நிா்வாகங்கள், காவல்துறையிடம் அனுமதி பெற்ற பிறகே சிலை அமைக்க முடியும் என்றாா் ஆட்சியா் எஸ். திவ்யதா்ஷினி.