தோஷ பரிகார பூஜையில் நகையை பறிகொடுத்த பெண் தற்கொலை

தோஷ பரிகார பூஜையில் நகையை பறிகொடுத்த பெண் தற்கொலை செய்து கொண்டாா்.

திருச்சி உறையூா் பகுதியை சோ்ந்தவா் ஜெகன். இவருக்கும் திருவானைக்கா பாரதி தெருவில் வசிக்கும் சுகந்திக்கும் (26) கடந்தாண்டு திருமணம் நடைபெற்று ஒரு குழந்தை உள்ளது.

தாய் வீட்டில் வசித்த சுகந்தியை ஜெகன் ஞாயிற்றுக்கிழமை வந்து சந்திந்தாா். அப்போது ஜோதிடம் செல்லும் மா்ம நபா் ஜெகனை பாா்த்து உன் குழந்தைக்கு நேரம் சரியில்லை, பரிகாரம் செய்ய வேண்டுமெனக் கூறியுள்ளாா். இதற்கு உடன்பட்ட ஜெகன் பரிகார பூஜை செய்ய சம்மதித்து, மனைவி சுகந்தி கழுத்தில் இருந்த தாலி, கம்மல், மோதிரம் ஆகியவற்றை கழற்றிக் கொடுத்தாா்.

அப்போது அந்த நபா் ஒரு செம்பில் புளியைக் கரைத்து அதில் நகையைப் போட்டு மஞ்சள் துணியால் மூடிக் கொண்டு வாருங்கள் எனக் கூறியுள்ளாா். அதன்படி அவா்கள் செய்த நிலையில், தம்பதியை முச்சந்திக்கு சென்று கற்பூரம் ஏற்றி வரும் படி கூறியுள்ளாா். அதன்படி இருவரும் சூடம் ஏற்றி விட்டு வந்து பாா்த்தபோது ஜோதிடா் மாயமாகிவிட்டாா்.

சந்தேகமடைந்த ஜெகன் செம்பைத் திறந்து பாா்த்தபோது நகை இல்லாததைக் கண்டு அதிா்ச்சியடைந்து ஸ்ரீரங்கம் குற்றப்பிரிவு காவல் நிலையத்தில் புகாா் செய்தாா். நகையைப் பறிகொடுத்த அதிா்ச்சியில் யாருடனும் பேசாமல் இருந்த சுகந்தி செவ்வாய்க்கிழமை மாலை வீட்டில் தூக்கிட்டுத் தற்கொலை செய்து கொண்டாா். ஸ்ரீரங்கம் போலீஸாா் விசாரிக்கின்றனா்.