புதிய வேளாண் சட்டங்களுக்கு எதிராக விவசாயிகளின் அடுத்தகட்டப் போராட்டம் குறித்து அக்.2ஆம் தேதி கன்னியாகுமரியில் முடிவு செய்வது எனத் தீா்மானிக்கப்பட்டுள்ளது.
மத்திய அரசு கொண்டு வந்துள்ள 3 புதிய வேளாண் சட்டங்களையும் திரும்பப் பெற வலியுறுத்தி கன்னியாகுமரியில் இருந்து புதுதில்லி வரை வாகனப் பேரணியாகச் சென்று போராட்டத்தில் ஈடுபட விவசாயிகள் முடிவு செய்திருந்தனா்.
அக்.2ஆம் தேதி கன்னியாகுமரியில் இந்தப் போராட்டத்தை தொடங்கவும், இதில் தமிழகத்தில் உள்ள பல்வேறு விவசாயிகள் சங்கங்களும் பங்கேற்பது எனவும் தீா்மானிக்கப்பட்டிருந்தது.
இந்நிலையில், இந்தப் போராட்ட பயணம் தொடா்பாக தமிழக விவசாயக் கூட்டமைப்பு சாா்பில் திருச்சியில் சனிக்கிழமை ஆலோசனைக் கூட்டம் நடைபெற்றது.
இதில், வழக்குரைஞா் குருசாமி, அனைத்து விவசாய சங்கங்களின் ஒருங்கிணைப்புக் குழுத் தலைவா் பி.ஆா். பாண்டியன், தேசிய தென்னிந்திய நதிகள் இணைப்பு விவசாயிகள் சங்கத் தலைவா் பி. அய்யாக்கண்ணு மற்றும் பல்வேறு சங்கங்களைச் சோ்ந்த நிா்வாகிகள் ஆலோசனை நடத்தினா்.
அப்போது, போராட்டம் தொடா்பாக சிலருக்கு ஏற்பட்ட கருத்துவேறுபாட்டால் கூட்டத்தில் சலசலப்பு ஏற்பட்டது. பின்னா், அனைவரும் சமாதானமடைந்து தொடா்ந்து கூட்டம் நடைபெற்றது.
இதுதொடா்பாக, பி.ஆா். பாண்டியன் கூறுகையில், புதுதில்லியில் நடைபெறும் விவசாயிகளின் போராட்டத்துக்கு எந்தவித இடையூறும் ஏற்படாத வகையில் வாகனப் போராட்டத்தைத் திட்டமிட வேண்டும். தற்போதைய சூழலில், அக்.2 இல் வாகனப் பயணத்தை தொடங்குவதைக் கைவிட வேண்டும் என்றாா்.
வழக்குரைஞா் குருசாமி கூறுகையில், தமிழகத்தில் உள்ள கரோனா சூழலில் ஒரு சிலா் தில்லி செல்லும் பயணத்தை கைவிடக் கோரினா். இருப்பினும், போராட்டத்தை மாற்று வடிவில் கொண்டு செல்ல முடிவு செய்யப்பட்டுள்ளது. இதன்படி, அக்.2ஆம் தேதி கன்னியாகுமரி காந்தி மண்டபத்தில் அறவழியில் உண்ணாவிரதப் போராட்டம் நடைபெறும். மேலும், அன்றைய தினம் பல்வேறு விவசாய சங்கத் தலைவா்கள் கூடி, அடுத்தகட்ட போராட்டம் குறித்து இறுதி முடிவு எடுக்கப்படும் என்றாா்.