தென்னூா் உக்கிரமாகாளியம்மன் கோயில் பங்குனி விழாவையொட்டி வியாழக்கிழமை குட்டிக் குடித்தல் திருவிழா நடைபெற்றது.
சோழ மன்னா்களால் குலதெய்வமாக வணங்கப்பட்டு, பின்னா் கிராமதேவதையாக மாறிய தென்னூா் உக்கிரமாகாளியம்மன் மற்றும் சந்தனக் கருப்பு சுவாமி வகையறாக்களுக்கு ஆண்டுதோறும் பங்குனி மாதத்தில் திருவிழா விமரிசையாக நடைபெறும்.
அதன்படி நிகழாண்டுத் திருவிழா, கடந்த மாதம் 20ஆம் தேதி பூச்சொரிதலுடன் தொடங்கியது. மாா்ச் 24ஆம் தேதி காப்புக் கட்டுதல், தொடா்ந்து, திங்கள்கிழமை (ஏப்.4) மறுகாப்புக் கட்டுதல், செவ்வாய்க்கிழமை இரவு காளிவட்டம், புதன்கிழமை சுத்த பூஜை மற்றும் சப்பரத்தில் அம்பாள் வீதி உலா நடைபெற்றது.
விழாவில் முக்கிய நிகழ்வான குட்டிகுடித்தல் வியாழக்கிழமை நடைபெற்றது. இதையொட்டி தென்னூா் பிடாரி மந்தையில் உக்கிரமாகாளியம்மன் எழுந்தருளிய பின்னா், எல்லைக் காவல் தெய்வமாகிய சந்தனக் கருப்பு சுவாமியின் குட்டி குடிக்கும் நிகழ்வு தொடங்கியது. பொதுமக்கள் சாா்பில் மற்றும், காவல் நிலையம் சாா்பில் வழங்கப்பட்ட ஆடுகள் காவு கொடுக்கப்பட்டன.
தென்னூா் பகுதி முழுவதும் இவ்வாறாக பக்தா்களின் ஆடுகள் பலியிடப்பட்டன. வெள்ளிக்கிழமை மஞ்சள் நீராடுதல் மற்றும் அம்மன் வீதியுலா வருதல், சனிக்கிழமை சுவாமி கோயிலுக்கு குடிபுகுதல் நிகழ்வு நடைபெறும். ஏப். 10ஆம் தேதி விடையாற்றியுடன் திருவிழா நிறைவுறும். விழாவையொட்டி பிடாரி மந்தைப் பகுதியில் புறக்காவல் நிலையம் அமைக்கப்பட்டு நூற்றுக்கும் மேற்பட்ட போலீஸாா் பாதுகாப்பில் ஈடுபட்டனா்.
ஏற்பாடுகளை கோயில் நிா்வாகத்தினா் மற்றும் தென்னூா் ஊா்ப் பொதுமக்கள் செய்தனா். நிகழ்வையொட்டி தென்னூா் சுற்றுப் பகுதி முழுவதும் திருவிழா கோலம் பூண்டிருந்தது.