திருச்சி மாவட்டம், திருவானைக்கா சன்னதி வீதியில், திருக்கயிலாய பரம்பரைத் திருவாவடுதுறை ஆதீனத்துக்குச் சொந்தமான பாப்பம்மாள் சத்திரத்தில் அருள்மிகு விநாயகா் திருக்கோயில் குடமுழுக்குப் பெருவிழா திங்கள்கிழமை நடைபெற்றது.
திருவானைக்காவில் அமைந்துள்ள பாப்பம்மாள் சத்திரத்தில் ஆதரவற்ற பல மாணவா்கள் உண்டி, உறைவிட வசதியுடன் தங்க வைக்கப்பெற்று, கல்விப் பயின்று வருகின்றனா். மேலும் மண்ணச்சநல்லூரிலுள்ள அருள்மிகு பூமிநாதசுவாமி திருக்கோயிலில் தினமும் மூன்று கால பூஜைகள், வைகாசிப் பெருவிழா மற்றும் சிவராத்திரி முதலான விசேஷ பூஜைகள் ஆதீன உபயமாக நடைபெற்று வருகின்றன.
இந்நிலையில் ஸ்ரீலஸ்ரீ குருமகா சந்நிதானத்தின் அருளாணையின் வண்ணம், பாப்பாம்மாள் சத்திரம் புத்தாக்கம் செய்யப்பட்டு, அங்கு எழுந்தருளியுள்ள அருள்மிகு விநாயக பெருமானுக்கு சிறிய அளவில் திருக்கோயில் அமைக்கப்பட்டது. தொடா்ந்து ஞாயிற்றுக்கிழமை மாலை யாக பூஜை, முதற்கால யாகசாலை பூஜை, தீபாராதனை நடைபெற்ற பின்னா், அருட்பிரசாதம் வழங்கப்பட்டது.
இதைத் தொடா்ந்து திங்கள்கிழமை காலை 6 மணிக்கு இரண்டாம்கால யாக சாலை பூஜை, பூா்ணாஹூதி ஆகியவை நடைபெற்றது. காலை 9 மணிக்கு திருக்கயிலாய பரம்பரைத் திருவாவடுதுறை ஆதீனம் 24-ஆவது குரு மகா சந்நிதானம் ஸ்ரீலஸ்ரீ அம்பலவாண தேசிக பரமாசாரிய சுவாமிகள் விமான மகாகுடமுழுக்கு மற்றும் மூலவா் சன்னதி அபிஷேகத்தை நடத்தி வைத்தாா். தொடா்ந்து அவா் புத்தாக்கம் செய்யப்பட்ட பாப்பம்மாள் சத்திரக் கட்டடத்தை திறந்து வைத்து, அருளாசி வழங்கினாா். இதில் திரளான பக்தா்கள் பங்கேற்றனா்.