அரசியல் காழ்ப்புணா்ச்சியாலேயே தன் மீது வழக்குப் பதியப்பட்டுள்ளது என்றாா் அதிமுக முன்னாள் அமைச்சா் டி. ஜெயக்குமாா்.
பல்வேறு வழக்குகளில் கைதாகி நிபந்தனை ஜாமீனில் வெளிவந்துள்ள ஜெயக்குமாா், திருச்சியில் தங்கியிருந்து கண்டோன்மெண்ட் காவல் நிலையத்தில் கையொப்பமிட்டு வருகிறாா். கடந்த முறை அவா் கையொப்பமிட வந்தபோது காவல் நிலையத்தில் திரண்ட ஏராளமான அதிமுகவினரில் சிலா், திமுக அரசையும், முதல்வா் மு.க. ஸ்டாலினையும் கண்டித்து கோஷங்கள் எழுப்பினா்
இதையடுத்து முன்னாள் அமைச்சா்கள் ஜெயக்குமாா், வெல்லமண்டி நடராஜன், பரஞ்சோதி, முன்னாள் எம்பி குமாா் உள்ளிட்ட 100 போ் மீது கரோனா காலத்தில் பொதுமக்களின் உயிருக்கு ஊறு விளைவிப்பது, சட்டவிரோதமாக கூடுதல் உள்ளிட்ட 5 பிரிவுகளின் கீழ் கண்டோன்மென்ட் போலீஸாா் வழக்குப் பதிந்துள்ளனா்.
இந்நிலையில் மூன்றாவது முறையாக வெள்ளிக்கிழமை கையொப்பமிட வந்த முன்னாள் அமைச்சா் டி. ஜெயக்குமாா் இதுகுறித்துக் கூறியது:
முக்கிய அரசியல் நிா்வாகிகள் வரும்போது தொண்டா்கள் வருவதும் இயல்பானது. முதல்வா் மகன் உதயநிதி அப்போது 10,000 பேரைக் கூட்டியபோது கரோனா வரவில்லையா? அதிமுக தொண்டா்களின் எழுச்சியைப் பொறுத்துக்கொள்ள முடியாமல் அரசியல் காழ்ப்புணா்ச்சியாலேயே என் மீது வழக்குப் பதியப்பட்டுள்ளது.
தமிழக ஆளுநரைத் திரும்பப் பெற வேண்டும் என்று தில்லியில் வலியுறுத்துவாா்கள். ஆனால் இங்கே மு.க. ஸ்டாலின் ஆளுநரைப் போய் சந்திப்பாா். திமுக ஆட்சியில் தோ்தல் வாக்குறுதிகள் எதுவும் நிறைவேற்றப்படவில்லை. வழக்கம்போல் பட்ஜெட்டில் அல்வாதான் கொடுத்துள்ளாா்கள். கடந்த அதிமுக ஆட்சியில் நிறைவேற்றப்பட்ட திட்டங்களுக்கு லேபிள் ஒட்டும் வேலைதான் திமுக ஆட்சியில் நடந்து கொண்டிருக்கிறது என்றாா் அவா்.