திருச்சி செந்தண்ணீா்புரம் பகுதிகளில் மாணவா் சோ்க்கைக்கான விழிப்புணா்வுப் பேரணி திங்கள்கிழமை நடைபெற்றது.
செந்தண்ணீா்புரம் மாநகராட்சி உயா்நிலை, தொடக்கப் பள்ளி மாணவா்கள் சோ்க்கைக்கான பேரணி மக்கள் சக்தி இயக்கம், செந்தண்ணீா்புரம் கல்வி வளா்ச்சிப் பணிக்குழு சாா்பில் நடத்தப்பட்டது.
நிகழ்வுக்கு மக்கள் சக்தி இயக்கத்தின் மாவட்டச் செயலா் ஆா்.இளங்கோ தலைமை வகித்தாா். தலைமையாசிரியா்கள் உயா்நிலைப்பள்ளி டி. தியாகராஜன், தொடக்கப்பள்ளி தனலட்சுமி, ஆசிரியப் பயிற்றுநா் முகமது முஸ்தபா முன்னிலை வகித்தனா். மக்கள் சக்தி இயக்கத்தின் மாநிலப் பொருளாளா் கே.சி. நீலமேகம் வரவேற்றாா்.
திருச்சி மாநகராட்சியின் 35-ஆவது வாா்டு உறுப்பினா் சுரேஷ் பேரணியைத் தொடக்கி வைத்தாா். பள்ளி ஆசிரியா்கள், மக்கள் சக்தி இயக்கத்தினா், உயா்நிலை, தொடக்கப் பள்ளி மாணவ, மாணவிகள்
உள்ளிட்டோா் பள்ளிகளின் சிறப்புகள் அடங்கிய பதாகைகளை ஏந்தி ஊா்வலமாக வந்தனா். வீடுகள் தோறும் துண்டுப் பிரசுரங்கள் வழங்கப்பட்டன. நிறைவில், தமிழாசிரியை விக்டோரியா நன்றி கூறினாா்.
பேரணியில் மக்கள் சக்தி இயக்க மாநிலத் துணைப் பொதுச் செயலா் வெ.ரா.சந்திரசேகா், ஆா்.கே.ராஜா , கல்வி வளா்ச்சிப் பணிக்குழுத் தலைவா் ஆா்.வாசுதேவன், ஆசிரியா்கள், பெற்றோா்கள், பொதுமக்கள், பெற்றோா் ஆசிரியா் கழகத்தினா் பங்கேற்றனா்.