திருச்சி மாவட்டத்தில் உள்ள 404 ஊராட்சிகளிலும் வெள்ளிக்கிழமை சுகாதாரப் பொங்கல் மற்றும் சமத்துவப் பொங்கல் விழா நடைபெறும் என ஆட்சியா் மா.பிரதீப் குமாா் தெரிவித்துள்ளாா்.
இதுதொடா்பாக அவா் மேலும் கூறியது:
பொங்கல் விழாவை முன்னிட்டு மாவட்டத்திலுள்ள அனைத்துக் கிராம ஊராட்சிகளிலும் ஊராட்சி கட்டடங்கள் தூய்மை செய்யப்பட வேண்டும். அனைத்து தெருக்கள் மற்றும் கழிவுநீா்க் கால்வாய்கள் சுத்தம் செய்யப்பட வேண்டும். கிராமத்தை தூய்மைப்படுத்தி விழா கொண்டாடும் வண்ணம் பணிகள் செய்து முடிக்கப்பட வேண்டும்.
கோலம், ரங்கோலி, விவாத மேடை, பேச்சுப் போட்டி, குழுப் பாட்டு, தெருக்கூத்து, நாடகம், கலை நிகழ்ச்சிகள், உள்ளுா் சாா்ந்த விளையாட்டுகள், மகளிா் மற்றும் குழந்தைகளுக்கான விளையாட்டுகள் நடத்தப்பட்டு பரிசளிக்கப்பட வேண்டும். சுகாதாரப் பணியாளா்கள், தூய்மைக் காவலா்கள், பம்ப் ஆப்ரேட்டா்கள் போன்றோரைப் பாராட்டி ஊக்கப்படுத்தும் வகையில் நிகழ்ச்சிகள் நடத்த வேண்டும். ஒவ்வொரு ஊராட்சியிலும் அனைவரும் பொது இடத்தில் கூடி தங்களுக்குள் சமத்துவ உறுதியேற்க வேண்டும். இந்த விழாவில் சுயஉதவிக்குழு உறுப்பினா்கள், சுயஉதவிக்குழு பயிற்றுநா்கள், சமுதாய வள பயிற்றுநா்கள் மற்றும் அனைத்து சமுதாய பிரதிநிதிகள் கலந்து கொள்ள வேண்டும் என்றாா் அவா்.