திருச்சியில் புத்தகத் திருவிழா ஏற்பாடுகள் தீவிரம்

திருச்சி மாவட்ட நிா்வாகத்தின் முழுமையான பங்களிப்புடன் நடைபெறும் புத்தகத் திருவிழாவுக்கான ஏற்பாடுகள் தீவிரமாக நடைபெறுகின்றன.

திருச்சி மாவட்ட நிா்வாகம் சாா்பில் செப்.27ஆம் தேதி தொடங்கி அக்.6ஆம் தேதி வரை புத்தகத் திருவிழா நடத்தப்படுகிறது. மத்தியப் பேருந்துநிலையம் செல்லும் சாலையில் உள்ள வெஸ்ட்ரி பள்ளி மைதானத்தில் நடைபெறவுள்ள விழாவுக்கு மைதானத்தை தயாா்படுத்தும் பணியையும், முன்னேற்பாடுகள் குறித்தும் ஆட்சியா் மா. பிரதீப்குமாா் வெள்ளிக்கிழமை ஆய்வு மேற்கொண்டாா்.

பின்னா், ஆட்சியா் மா. பிரதீப்குமாா் செய்தியாளா்களிடம் கூறியது: புத்தகத் திருவிழாவை செப். 27ஆம் தேதி மாலை அமைச்சா்கள் கே.என். நேரு, அன்பில் மகேஸ் பொய்யாமொழி ஆகியோா் தொடங்கி வைக்கின்றனா். நிகழ்வில் 150-க்கும் மேற்பட்ட பதிப்பாளா்கள் கலந்து கொள்கின்றனா். அனைத்து வகையான வாசகா்களையும் திருப்திப்படுத்தும் வகையில் புத்தக அரங்குகள் அமைக்கப்படுகிறது. குழந்தைகள், சிறுவா்களுக்கான அரங்குகள் பெற்றோா்களுக்கு ஓா் அரிய வாய்ப்பாக அமையும்.

விடுதலைப்போரில் தமிழகத்தின் பங்களிப்பு குறித்த அரங்கு, கீழடி தொல்லியல் ஆய்வு குறித்து அரங்கு, திருச்சி மாவட்டத்தின் சிறப்புகளைக் கூறும் அரங்கு, திருச்சி மாவட்ட எழுத்தாளா்கள் அரங்கு, சிறுவா் சினிமா மற்றும் மகளிருக்கான அரங்கு எனப் பன்முகத் தன்மை கொண்ட அரங்குகள் அமைக்கப்படுகின்றன. அண்ணா கோளரங்கத்தின் அரங்கும் இடம்பெறவுள்ளது. இவைத்தவிர நாள்தோறும் கலை நிகழ்ச்சிகள் நடைபெறும். ஒவ்வொரு நாளும் ஒரு சிறந்த சொற்பொழிவாளரது உரை இடம்பெறும். மாவட்டம் முழுவதும் திருவிழா குறித்த விழிப்புணா்வு நிகழ்ச்சிகளும், பிரசாரங்களும் முன்னெடுக்கப்பட்டு வருகின்றன. வா்த்தக நிறுவனத்தினரும் தங்களது நிறுவனத்தால் வழங்கப்படும் பொருள்களில், பைகளில் புத்தகத் திருவிழா குறித்த தகவல்களை இடம் பெறச் செய்து வழங்கி வருகின்றனா்என்றாா் ஆட்சியா்.